Лух Авт
Ашкуӆа куща нэ верам айкеӆ
Кашӊ хатнэху ашкуӆая утаӆтатыя яӊхас. Ма ищиты катра Асов куртаӊ ашкуӆайн утаӆтысам. Щиӊанща щи вер вушат эӆты няӆъяӊ моӆтас таӆ ёхи щи хащас. Мосванан ма рут муван усам па щи ашкуӆаема ӆоӊтысам, ӆув куща нэӊаӆ Галина Алексеевна Новикова (Енова) пиӆн ияха уйтантысман па няврэмат утаӆтаты верат эӆты потартсаман. Газетая потрэв ӆэщатмев порайн, ям айкеӆан ёхатсаюв — «Почётный работник сферы образования Российской Федерации» нэман юкантса.
Галина Алексеевна ар няврэмаӊ хоттэӆэн сэма питас. Хоӆ уна йисат, энапсат, арсыр тахаятн утаӆтысат. Санкт-Петербурган, Пулӊаватан, Асов куртан уӆӆат. Хоты там рупатая питас, щит эӆты ясӊев еӆӆы туӆӆы:
– Ма там куртаӊ ашкуӆаеман 32-мет таӆ рупитӆам. Ёхатмеман, ашкуӆа куща нэӊа Ольга Геннадьевна Жернакова шуӊат ус. Ӆув манэм няврэмат хатӆат сыс ӆаваӆты нэӊа тый рупиттыя вохсаӆӆы. Юхат ма ай классатан няврэмат утаӆтаты питсам. Еӆӆы утаӆтысам па похат-эвет рущ ясӊа па литературая утаӆтаты нэӊа йисам. Щиӊанща 2011-мет таӆ вуш эӆты утаӆтаты нэӊӆаман Асов ашкуӆа куща нэӊа пирысайм. 2013-мет таӆн ай няврэмат яӊхты садик кутоп ашкуӆаева маса. Ин Образовательно-воспитательной центра йис.
– Муй арат хатнэху тамхатӆ нын хощайн няврэмат утаӆтаӆ?
– Ин муӊ хощаев няврэмат утаӆтыман аратаӆн 23 хатнэху уӆ. Ар таӆ сыс похат-эвет утаӆтаты хоятат ищи уӆӆат. Хув вуш эӆты Вера Филипповна Ильина рупитӆ. Ӆув рупата таӆӆаӆ 40-мет таӆа ванамасат. Щаӆта Екатерина Михайловна Ганюгина па рупитӆ. Педагогической рупата вераӆ таӆаӊтэӆн 46-мет таӆ хувата щи йиӆ. Щит шеӊк вещката муӊ няврэмӆув пиӆан рупитты хатнэху. Алла Александровна Ильина ар таӆ сыс ашкуӆаевн биология верата ай ёхӆув утаӆтас па 16 таӆ сыс ашкуӆа куща лаӊкар нэӊа ус. Там пуш ӆув щутщатыя манас. Социальной педагога муӊ хощаев Светлана Владиславовна Халиулина уӆ. Щаӆта Михаил Валерьевич Новиков няврэмат юх эӆты арсыр пормасат вертыя утаӆтаӆ. Светлана Александровна Маклакова физкультура верат муӊ ай ёхӆува япсыена кашӊ хатӆ сыс ванӆтаӆ. Щиӊанща няврэмат утаӆтаты ёх па уӆӆат, мата хоятат Асова ёхи хащам таӆатн рупиттыя ёхатсат.
– Галина Алексеевна, муй арат няврэм там пуш нын ашкуӆайн етшаптас?
– Там пуш 10-мет па 11-мет классатн утаӆтаты ай ёх ант па тайсув. Яртъяӊмет класс етшаптам вет няврэм муӊ ашкуӆаев юпийн еӆӆы утаӆтатыя Пулӊават вош многопрофильной колледжа мантсат.
Там таӆн Асов куртаӊ кутоп ашкуӆаевн 52 ай ёх утаӆтаӆув. Щаӆта 26 ай няврэм садик хотэва ёхтас. Колледж етшаптаты арпелак пох па эви Пулӊават вошевн хащӆат па щита уӆты-хоӆты щирӆаӆ ӆэщатӆат. Муӊ хощаев тата ищипа рупата антом.
Там йисн Асован туп куртаӊ куща хотэв, кутоп ашкуӆаев, нови тут вущитты па хотат хошмаӆты тахайӊан рупитӆаӊан. Щикуш хуӆ веӆпасӆаты тахаев уӆ па ӆый хощаеӆ там кутн рупитты хоятаӆ ар.
– Муйсыр нопсат няврэмат утаӆтаты щирн па тайӆаты?
– Ма щирэман, муӊ шеӊк мосты па умащ рупата верат кашӊ таӆ пораятн ӆэщатӆув. Муй арат хатнэху ашкуӆаев юпийн воӆаӊ хоята йис. Щи вер ураӊан тата хонна «Ими гордится школа» нэмпи сохаӆ ӆэщатсув па щимащ ёхӆув нэмат нох ханшсув. Еӆӆы муӊ ищиты верытты кеман рупиттыя питӆув.
– Галина Алексеевна, нын мосты вер верӆаты, ищиты еӆӆы тумтака па яма уӆаты! Шеӊк ар юр па номас муӊева катра па там йисн няврэм утаӆтаты хоятат маӆат.
Нумаӆмаӆув щимащ Асов куртаӊ 8-таӆпи ашкуӆайн муӊев япсыена па вещката утаӆтам нэӊӆув: Е.Г. Елескина, З.Д. Новикова, Л.А. Ковалёва, Р.Т. Завьялова. Шеӊк такан тайсаюв па туса рущ ясӊа утаӆтасаюв. Мосаӊ, щи ураӊан муӊ тамхатӆ еӆӆы уӆты-хоӆты щирӆув там нови туром иӆпийн туса верӆув!
Владимир Енов ханшам потар
Авторы
Лух Авт
Темы