Лух Авт
Ашкуӆая манты нётапса вер
Щёхар тыӆащ оӆаңмет хатӆ унты, кашң хоят, хой верытаӆ мойӆапса верты, ашкуӆая манты няврэмата вертты кем мойӆапсайт ӆэщатсат.
Там пуш ярсот хоят па атэӆ рупитты хоятат «Няврэм ашкуӆая акатӆэв» мойӆаптаты акцияйн яха пиӆтащсат, щи тумпийн хоӆна сот моӆтаскем яха рупитты хоятат па предприятияйт.
Ар няврэм тайты хоттэӆат, хой семья тыӆащ уӆты охаӆ шимӆа хойӆ, тухӆат вера питам юпийн ӆавартан уӆӆат, мушаң няврэмат кашң сус мойӆапсаятан маӆайт. Ашкуӆая яңхты яӆап кен рюкзак ӆыпия ханшты па щуратты юхатан понтсайт, нэпек эӆты оляпан нёсытты хошапат, ханшты нэпекат па арсыр мосты пормас. Ашкуӆая яңхты эӆа па кура ӆуматты сохат, планшетат па компьютерат.
Муши вошан уӆты Роман Еприн пиӆан потрэмисам. Ӆув хуӆам няврэмаӆ утща энмаӆӆаӆӆы. Ун эвеӆ там пуш ашкуӆая оӆаңмет класса манас. «Унт ӆор тыӆащ хащам ӆапатан социальной защита эӆты ма эвем ашкуӆая манты мойӆапсайн туса. Няврэмем щимащ мойӆапсая шеңк амтас. Ашкуӆая манты муң щикуш ӆэщатысув. Там мойӆам пормасат ищи щаха мосмитӆат. Тамащ акция верты хоятата ун пумащипа ясаң китӆам. Щит хоты шеңк ям нётапса. Ям вер верты самаң хоятат моӆты порайн мет ун ойн ат ёхатӆайт», — Роман Яковлевич ястас.
Ашкуӆайн утаӆтыты няврэмата хоятат нётты департамент эӆты кашң таӆ ох нётапса па сохаптаӆа. Хой няврэмӆаӆ яңмет класса па веӆщи ашкуӆая манӆат, ай тахайт потты оӆаңмет хатӆ унты МФЦ хуват заявление нэпек яӆпа мосаӆ ханшты, аӆ па почта хуват социальной защитая письмайн китты. Заявление пиӆан мосаӆ справка вуты, хота ханшман уӆ няврэмен округеван уӆты ашкуӆайн утаӆтыйӆ.
Зоя Куртямова ханшам потар
Авторы
Лух Авт
Темы