Лух Авт
Асов курт хуӆ веӆты ёх
Ин хуӆ веӆты ёх ӆуң веӆпасӆаты пораеӆ манаӆ. Хасям ӆапатан ма Асов курта яңхсам, Асов пуңаӆан, Тук ӆоран, Карвошан, Посӆов куртан хуӆ веӆпасӆаты ёх пиӆан уйтантысам.
Асов рыбоучасток Горка вош рыбозавода ӆуңтасаӆ. Асов хуӆ веӆпасӆаты ёх куся Николай Николаевич Гилёв пиӆан потартсам, хуӆ веӆпасӆаты хоятӆаӆ эӆты ясаң тус: «Кусяя хуӆамхосьяң таӆ рупитӆам. Штат сирн ихосьяң хоят рупитаӆ. Няӆ хоят ӆуң сыс контракт нэпек ӆэсятсат. Хоятӆув Кочагатка посӆ эӆты Ёмвош мув кимаӆ унты хуӆ веӆман уӆӆат. Ноптаӆты панат тайӆув. Сит — Каневской, Ишварской па Емаң пан.
Там пуш еңкаӆ хув ант манас, сишан Ас нопатты тыӆась хасям хатӆатан туп ӆашкупат тусайт па хуӆ веӆты ёх рупатая этас. Хасям таӆан ветхосьяңмет хатаӆан этсат. Ай тахайт потты тыӆась яңмет хатӆ кеман ӆуң веӆпасӆаты пораев етшаӆ.
Емаң пан Послов курт па пелакан уӆ. Сита Александр Павлович, Станислав Николаевич, Игорь Юрьевич веӆпасӆыӆат. Хоӆ Шульгинат. Хасям хоятӆув Каневской панан хуӆ мосятӆат. Сит — Владимир Романович Лонгортов, Анатолий Никифорович Еприн, Николай Геннадьевич Салтыков, Андрей Валерьевич Хозяинов, Олег Яковлевич Тарасов, Евгений Владимирович Ковалёв, Родион Михайлович Лонгортов па Фёдор Николаевич Путров. Пётр Анатольевич Маклаков, Александр Геннадьевич Рочев, Эдуард Андреевич Тояров па Юрий Иванович Куртямов контракт сирн рупитӆат.
Ар пелак ӆуңан аршак хуӆ хойӆ. Там порайн си планэв тэкаптаӆэв. Хой уятаӆ, муй арат ӆуңан хуӆ питаӆ? Ин ун йиңк, хоӆыена хоӆпат омасӆат. Сусан ноптаӆты питӆат. Йиңкаӆ соханты юпийн, уйт ӆор хусмет хатӆ кеман вар верӆув. Ӆорат эӆты хуӆаӆ иӆ охаӆаӆ. Си порайн ӆорӆув лап пентӆаӆӆув. Там пуш яңкем тахайн вар верты утсиӆув. Ун йиңкаӆ хув ки ӆойты питаӆ, хуӆаӆ манаӆ. Каматса хоят варан рупитаӆ, хасям отӆаӆ ноптаӆӆат.
Там таӆан хуӆ веӆпасӆаты хоятат сорт, ай сортыет, мевты, тув хуӆ, ханшаң хуӆ, паннэ, щёхар, сарах маты верытӆат. Хасям таӆат пиӆан артаӆыман, 1995-мет таӆ эӆты там таӆат унты, 2000-мет таӆан мет ар 444 тонна хуӆ мосятсат. Си порайн хоӆна нови хуӆ — мохсаң, вунш, щёхар ар хойӆыйс, маты рахас. 2007-мет таӆ эӆты нови хуӆ мосятты ант рахаӆ.
Таӆ сыс йи хоята хуӆамхосьяң тонна хуӆ маты мосаӆ. Ӆуң сыс катсот тонна кеман мосятты. Ас нопатты тыӆась хуӆам хатӆ сыс Евгений Владимирович Ковалёв йи тонна, ущ тыӆасян — хуӆам тонна хуӆ мас, передовика уӆ. Владимир Романович Лонгортов хуӆамсот па кат тонна мосятас. Анатолий Никифорович Еприн ветсот па тонна веӆпасас.
Хоӆна ущ тыӆасян — Олег Яковлевич Тарасов кат тонна, Александр Павлович Шульгин йи тонна, Станислав Николаевич Шульгин кат тонна моӆтас, Фёдор Николаевич Путров хуӆам тонна хуӆ мосятсат.
Хой штат сиран рупитаӆ, кашң таӆ ӆуматты сохан, ёша ӆуматты резина посан, костюман, сопекан, хоӆпат ураңан пормасат, бензинан, таӆ сохан кат таӆ йи пуш, вет таӆ сыс йи пуш мотуран маӆайт.
Сохаптаты охаӆ щах шимаӆ. Ӆуңан йи килограмм маты сортаӆ хольмаң, мевты хольмаң пеӆа няӆ арата, ханшаң хуӆ няӆхосьяң соӆкувая хойӆ. Муй арат хуӆ мосятӆан, си арат ох шитӆан».
Кимет ӆапатан, сютсяты хатӆатан хуӆ веӆты ёх емаң хатӆэӆ постаты питӆат. Ӆорвош районан веӆпасӆаты хоятат Хашкуртан, Аканлейман па Унтсыӆкуртан акатӆайт. Хоятат тохи яңхты верытӆат.
Еӆӆы пеӆа, хуӆ веӆпасӆаты хоятӆув тумтака ат уӆӆат, хоӆапӆаӆа ар хуӆ ат хойӆ, рупата охӆаӆ ат эӆатӆайт. Тумтак ёш, тумтак кур!
Альбина Тырлина ханшам потар