Лух Авт
Асов куртаң леккар нэңңан
Асован хуӆамсот моӆтаскем хоят уӆ. Ар тэӆан хантэт па саранат, еӆта ёхтам хоят шеңк антом. Куртан уӆты хоятат вой-хуӆ веӆпасӆыман уӆӆат. Хотвоӆ войт энмаӆман, ӆуңан торан верӆат. Яӆап хотат омасӆат, вонщамотат акатӆат.
Асов курта ёхтыӆымеман сора кеша леккар хота ӆоңтысам. Щита Марина Анатольевна Дъячкова (Куртямова) па Александра Евгеньевна Маклакова (Лонгортова) рупитӆаңан. Ӆын яха Щаня ёхан Ямкурт куртыенан сэма питсаңан щита энамсаңан. Интернатан уӆман, Овкурт ашкуӆайн ихощъяңмет класс унты утаӆтысңан. Леккар пеӆа утаӆтыман юпийн, Асов курта рупитты ёхатсаңан.
Рупатаем самаңа тайӆэм
Ешауӆ хольмаң пеӆа вет таӆа йиӆ, хоты Марина Анатольевна леккара рупитаӆ. Пулңават вошан утаӆтыты етшамаӆан, распределение хуват Ямкурта рупитты китса. Вет таӆ хащам юпийн па Асов курта манаӆ. Нийӆхус таӆа йис, хоты ӆув Асов куртаң леккар хотан куща нэңа па акушеркая рупитаӆ.
«Ма Александр Владимирович ийикем пиӆан хуӆам няврэм тайӆаман, кат эви па йи пох. Ун эвеман Кубанской государственной университетан кимет курсан утаӆтыйӆ. Ай отңаӆам ашкуӆая яңхӆатан. Рупата тумпийн мин няврэмӆаман пиӆан иса яха щутщаӆув, мячикан ёнтман па ӆохан хухатӆыман касӆув. Хоттэӆ кеша верты касапсаята па уйтантопсаята па яңхӆув.
Няврэмӆаман ай тэӆан нётасман уӆты утаӆтаӆӆаман. Хотэван кашң хоят уятаӆ хой муй вераӆ. Куртан уӆман рупата ар: ӆонщ хирты, йиңк аӆты, юх сэварты… Муң хоӆна мис па хормис тайӆув. Ӆунтат энмаӆты номас тайӆам, щит щаха ныты питӆа. Щит ураңан рупатайӆы омасты кум ант тайӆув. Ӆуңан торан верӆув, хоӆап вантӆув, вонщамотат акатӆув, нохар сэңкӆув», — щиты ӆув хоттэӆ уӆапсайӆ эӆты Марина Анатольевна потар тус.
Кашң хоят тумтак ат уӆ
Кимет айӆат леккар нэ — Александра Евгеньевна Маклакова (Лонгортова). 2019-мет таӆан многопрофильной колледж етшамаӆ юпийн, мохты Асов курта рупитты ёхтас. Там пуш вет таӆа йис, хоты ӆув леккар хотан фельдшера рупитаӆ. Там куртан ху сая манас. Хот омассатан. София эвие энмаӆатан.
«Ма ай тэӆан номас тайсам леккара рупитты, хоятата нётты. Уӆты куртэм па самема рахас. Леккар хота арсыр хоят ёхтыӆыйӆ: рупитты ёх, нэңат, пиращ хоятат, няврэмат. Щёмӆы ювам па пиращ хоятат хоща ёхи яңхӆув, вантман тайӆаӆлув. Садика яңхты па ашкуӆайн утаӆтыты няврэмат прививкайн понӆаӆӆув. Рупата иса уӆ. Портун тумпийн, хой хоята аӆ потрэматы мосаӆ, ям ясаңан ёхӆы ястаты, хойтат па аӆ хуӆантты. Куртэв ай, кашң хоят нэмаӆ хуват уятӆэв», — Александра Евгеньевна куртаң хоятӆаӆ па рупатайӆ эӆты потартас.
Леккар хотан рупитты нэңңаӆам куртаң хоятӆаӆ самаңа тайӆаӆӆан. Верты рупатаян яма уятӆаӆӆан. Хоят арсыр муш нёңхалан ёхтыӆыӆа. Муй иса верты хошты мосаӆ. Няврэм кашаңа йитаӆан, анти самаӆ турам иты патлама йиӆ. Хой па вана тайты рут хоятаӆ мушан ёхатӆа. Ат муй хатӆ, леккар хоща щи хухаӆӆа. Нётты вер ӆый эӆтэӆ ӆаваӆӆа.
Там кат самаң леккар нэңӆама куртаң мохиӆаӆ пиӆан пумащипа ясаң ястаӆам. Хоттэӆ па вошаң хоятӆын тумтака ат уӆӆат. Леккар хотан мосты портунат иса ат тайӆ.
Зоя Куртямова ханшам потар
Авторы
Лух Авт
Темы