Лух Авт
Асов куртаң няврэмат Леонид Бабанин пиӆан уйтантысат
Леонид Бабанин ван хатӆап тыӆащ 1-мет хатаӆан Нижневартовской район Ларьяк куртан сэма питас. Щаӆта антеӆ-ащеӆ пиӆн Суматвоша касӆас. Тата ашкуӆа етшаптас па еӆӆы Рига вошан тохӆаң хопан яңхты вера утаӆтыяс. Юхат ар таӆ Суматвошан тохӆаң хопат яңхты тахайн рупитас. Еӆӆы Ӆорвоша манас, тата яңкем таӆ тохӆаң хоп яңхты тахайн рупитас.
Ёрн мир кутн уӆмаӆн ӆув уӆопсайӆ эӆты оша верас, ин щи мир эӆты ун роман ханшаӆ, ешауӆ ханшты етшаптаӆ. Хунты Суматвош эӆты курн Москва хон воша яңхиӆыйс, ӆуӆн вантты, муй щирн Россия мувев хуваттыйн аӆ мир уӆ. Щи юпийн ар потар ханшас па киникайт эсӆас.
Ропхаң курк тыӆащн Югра мув киникайт ханшты ху Ямал мув Асов курта ёхтыӆыяс па ашкуӆа няврэмат пиӆн уйтантыйс.
Там уйтантопса ма тусэм, сырышак ӆув эӆтайӆ потартсам па Леонид Леонидович иньщассэм, муй щирн киникайт ханшты питас: «Ма айтэӆн киникайт ӆуңатты мосман тайсам, умща арсыр потрат потартсам, ашкуӆайн потрат туса ханшсам, щи ураңан уна ювмеман айӆтыена потрат ханшты питсам. Москва хон вошан писатель ху Виктор Пронин пиӆн уйтантысам. Ӆув Суматвоша мойңа ёхтыӆыяс па ӆухасӆув пиӆан тутаң хопн Обской губа хоща яңхиӆысув. Щита ма уйтаң писателя ястасам, уӆопсаемн арсыр умащ верат усат — киника ханшты веритӆам. Виктор Пронин ястас — ханша! Щиты 11 тыӆащ сыс ма «Плата по счетам» оӆаңмет киникаем ханшсэм. Щи юпийн еӆӆы ханшты питсам».
Еӆӆы ма ӆувеӆ иньщассам, муй щирн там йисн яӆап щирн ӆув киникайӆаӆ ӆуңатты рахӆ. Леонид Бабанин ястас, ям арат таӆ ёхӆы ӆув хоӆыена киникайӆаӆ хуӆантты па ай кинайт иты вантты рахӆ. Тамхатӆ ӆув няврэмата нэмасыя Q-код пиӆн карточкайт мойӆас, щи от мохты телефон хуват щитат шияӆаты рахӆ.
Щи тумпийн тамхатӆ мойң ху хораң вантопса ӆэщатас, щи хорат ӆув киникайӆаӆн ханшман уӆӆат. Щи вер эӆты ястас: «Ма хувн Екатеринбург вошаң хорат ханшты ху Альберт Туманов пиӆн и номасн рупитӆам. Ванта, киникайн хорат ханшман уӆӆат ки, умща ӆуңатты».
Щи тумпийн уйтантопсайн ястасам, яңкем таӆ ёхӆы Леонид Бабанин Донбасс мува яңхас па вантсаӆӆы, муй щирн щита мир ӆаварта уӆ, муй щирн ляль оӆңитса. Щи юпийн имохты рущ па английской ясаңңанан «Из Ханты-Мансийска в осаждённый Донбасс» киника этас. Муй ураңан английской ясаңан ханшас? Ӆуӆн па хон пелак муватн уӆты мир щи ляль эӆты оша ат версат. Ин ӆув мини-цех хоща хуӆ консервайт верӆ па щита уӆты мир па лялясты соӆтанӆув ураңан китӆ.
Ма иньщассэм, интам муй ханшаӆ? Ёхӆы ӆув ястас, ёрн мир йис уӆопса эӆты «Над озером Нумто летал кулик-сорока» нэмпи ун роман нэпек ханшаӆ, оӆаңмет главайт ин литературной журнал хоща ӆуңатты рахӆ.
Щи юпийн няврэмат утаӆтаты ёхн па няврэматн ӆув арсыр верат эӆты иньщасса. Ӆывеӆа умащ ус уйтты, ӆаварт муй анта арсыр потрат ханшты па па верат эӆты.
Щи юпийн Леонид Бабанин ястас: «Нын, няврэмат, айтэӆн щащет, аңкаңкет тайӆаты, аӆпа, айтэӆн нумӆаты, муйсыр эпӆаң ӆэтотатан нын ӆапатсайты? Щишн нын ашкуӆа куща нэ Галина Алексеевна Новикова пиӆн и номса ёхатсамн — ун кер тыӆащн «Бабушкины пирожки» нэмпи касопса ӆэщатты. Нынана мосӆ умащ потрат ханшты. Щаӆта артаӆаты ёх мет ям потрат пирыӆат па щи няврэмат ишакты нэпекат па тынаң мойӆапсэт ёша хоӆумтӆат».
Ёхи хащам артан няврэмат ӆув киникайӆаӆ па хорат вантсат, арсыр верат эӆты иньщассат.
Людмила Шульгина ханшам потар
Авторы
Лух Авт
Темы