Лух Авт
Асов куртаң тус нэңие
Там лопасан потрэм Асов куртаң тус нэңие эӆты туӆам. Сит — Наталья Яковлевна Шульгина (Тарасова). Ӆув хорам паркан эӆты посат, сэвам вайт, шаншкеӆат, няврэмат ӆуматты сохат сэваӆ, ёх, нэңат па няврэмат ханты ернасат ёнтаӆ, хорам хорат вераӆ — вантты умась. Округеван, районан манты вантопсаятан па уйтантопсаятан касаӆ, умась верты рупатайӆаӆ этаӆтыйӆ.
Уӆты рут мувием
Наталья Яковлевна манэма ӆув эӆтэӆ па верты рупатайӆаӆ эӆты потар тус: «Ма Асов куртан сэма питсам, энамсам, утаӆтысам. Ин тата уӆӆам па рупитӆам. Ашкуӆа етшаты юпийн Хон Петра вошан ай няврэмат пиӆан рупитты воспитателя, педагог-психолога утаӆтысам, ёхӆы йисам. Яңкем таӆ ашкуӆайн рупитсам, рут ясңа няврэмат утаӆтасам па ар хорпи пормасат верты кружок тусам. Си юпийн утхота рупитты вохсайм. Катхосьяң таӆ сита воӆаң специалиста уӆӆам».
Аңкем-асем шуңат
Тус нэңие рупатайӆы омасты ант верытаӆ. Аңкеӆан-асеӆан няврэмӆаӆ ай пора эӆты рупатая утаӆтасңан. Семьяеӆан яң няврэм ус. Аңкеӆ-асеӆ эӆты потартас: «Аңкем шуңат — Анна Петровна Тарасова (Отшамова). Уӆмаӆ сыс садикан няняя па ӆэтот каварман рупитас. Аңкем тус нэңа ус, вой сох пиӆан рупитас, куртан уӆты хоятӆува буркайт ёнтас. Иса рупитас, ситы нопсэман хасяс. Аңкев-асев пеӆая вантман, муң хоӆ моӆты верӆув. Опиӆам хоӆ сэвты, ёнтасты хошӆат. Яйӆам па апсем хот воӆан энмаӆты вой тайӆат, торн сэварӆат, хуӆ веӆман уӆӆат.
Ащем шуңат — Яков Гаврилович Тарасов, рыбозаводан рупитас. Катра порайн сит ун организация ус, хоӆ рыбозавода ӆуңтассат — садикан, ашкуӆайн рупитты, хот омасты ёх. Хоятат хуӆ веӆсат, мис пусты хота торан сэвартсат, юх ӆэсятсат, хот омассат. Муйн партсайт — сит версат. Асем шеңк пормасат верты хошас: ай хопат, ӆохат, ӆоваң ухӆат, ёӆан мосты пормасат.
Аңкем-асем уӆты сыс вой тайсаңан: ӆоват, мисат. Хасям таӆан туп Олег яем ӆоваӆ нох вусӆы. Си арат таӆ вой энмаӆтысув, муң ёра мисъйиңк йинсьсув, мисъйиңк ӆэтот, нёхи ӆэсув. Мосаң па хоӆна вой энмаӆсув. Утхот партам сирн, воята курт хуват яңхты ант рахаӆ, атэӆ тахайн тайты».
Вератты пеӆа самем хошийӆ
Тус нэңиев рупатайӆ тумпийн вератты пеӆа самаӆ шеңк хошийӆ. Ай пора эӆты сэвты, ёнтты питас. Сит эӆты мет умасьӆыман потартас: «Хун ашкуӆайн утаӆтыты етшасам, швея аттестат тайсам. Утаӆтымем порайн, куртаң хоятата штормовкайт, осам хырат, ӆаңкасты ӆуматты сохат, няврэмата кащат ёнтсув. Хун ашкуӆайн рупитты питсам няврэмат ёнтты, сак каратты, сэвты утаӆтасӆам. Ин манэма ёнтӆам, хоятат инсясты питсат, па хоятата ёнтты, сэвты питсам. Ёмвош ханты хоятат тайты хорам ханшийн ёнтам ернасат, щашкан сахат ёнтты утаӆтыӆам. Наң моӆты ки ӆэсятӆан, наң си верӆан. Куртан емаң хатӆат верӆув, вантопсайт ӆэсятӆув. Ай куртат ӆапкайн нэмоӆты антом. Емаң хатӆа моӆты мойӆаты мосаӆ, ёшан верам рупатаен мойӆаӆэн. Вантопсайт верӆув, форумата, уйтантопсаята яңхӆам».
Наталья Яковлевна, еӆӆы пеӆа хорам пормасӆан вантопсаятан этаӆтыяӆан, хошты верӆана энамты няврэмат утаӆтыяӆан. Тумтак ёш, тумтак кур.
Альбина Тырлина ханшам потар
Авторы
Лух Авт
Темы