Лух Авт
Атя, Ащи, Ащие – щит касаӊ няврем ораӊна омащ ясаӊ
Касаӊ таӆ ай тахайт патты тыӆащ холмет щутщаты хатӆна, Хон мув хуват Ащет емаӊ хатӆ постаӆа. Атя, Ащи, Ащие — щит касаӊ няврем ораӊна омащ ясаӊ, нэӊху каман таӆаӆ ат ос, Ащеӆ иёлты самаӆна ол. Ащи ясӆ ёр, ӆув нявремаӆ туӊ ёс хуват туӆӆы. Малай кепа хата антам амы пущщи лавӆа, хансӆа, Ащи пущщи па иёлты ярэмаӆа, топ ӆув ищи сэӊк ар верӆ.
Там лопасна муӊ нынан йи Ащи пущщи лаваӆта ӆытӆу, щит Денис Сергеевич Лонгортов. Ащи нэм 2013-мет таӆ эваӆт тайӆ, мет алаӊна Кирилл йикаӆ сэмна питас. 2017-мет таӆна па Диана эвиеӆ.
Ӆув Ӆорвош районна Овкуртан сэмна питас, щита онттыяс. Ашкоӆа етсаптамаӆ юпина Пулӊаватна онттыда манас, щита ӆув «Салехардской педагогической колледжа» «Страховое дело» хоща онттыяс, топ онттыйм тахайӆ пеӆа щиты ант питас ропытта. Денис ашкоӆайна онттыда питмаӆ итна северной многоборье пеӆа самаӆ хойс, щитна итта ты маса ӆув северной многоборье ропатайи тайӆаӆӆы.
«2002-мет таӆ эваӆт «Ямал мув окружной детско-юношеской касты ашкоӆайна по северному многоборью» ропытта лоӊсам. Личной, районной па окружной касты харатна призёра осам. Щи арат таӆ хуват каман сат мув суӊ вантсам, ниӆ пус па хон мувна командайи тэӆна каста яӊхсу. Номлэм, 2006-мет таӆна, муӊ Зимний Арктической ентапсэтна штат Аляская яӊхсув, щи пора ма самамна век хыщас. Хонты па муӊ щимащ тахайна питта веритӆу. Итта ма мули ант касӆам, хут таӆӆы йис хоты ма тренерры ропытӆам, нявремат онттаӆам.
Кат нявремам, йик па эви. Йикам ветмет класса онттыяӆ, эвем там таӆ веӆащ ашкоӆайна манас. Муӊ ай олмев порайна хонты харты аӆ ант амассу, хат ӆыпи ропата версу, каман нятсу. Щитна ма итта ищи нявремӊиӆам пиӆна мала аса яха верӆу. Йикам пиӆна орна яӊхламан, ӆув манэм каман ропата верта нятӆ. Ма ӆытӆам ма нявремӊиӆам вуӆӆы йитанна мала верта аса ат хассаӊан.
Там щутщаты хатӆат Хон мув хуват Ащет емаӊ хатӆ, касаӊ Ащи эӆты ма ӆытӆам ям ясаӊ китта. Касаӊ Ащи самна нявремӆаӆ алаӊ тахайна ат оллат. Йи ёс хуват йи кур понман ат сосӆат», — Денис Лонгортов лавас.
Ямал мувна 2018-мет таӆ эваӆт Совет отцов пунсса. Итта щита 21 ащи холамхощъёӊ округ муниципалитет эваӆт ол. Щи Совет ропытты сыс сат молтас мероприятие верса, наставничество, няврем ӆыӆ савиты па патриотической воспитание пиӆна.
Ар таӆӆы йис хоты Ямал мув хуват Ащет емаӊ хатӆ постаӆа, щи ораӊна муниципалитетатна праздничной мероприятияйт верӆайт. Щита — ащета юкантам фестивалят, конкурсат, каман рот мастер-классат, ентапсэт па па каман рот касты харат.
Вера Лонгортова хансам потар
Авторы
Лух Авт
Темы