Лух Авт
Ёх емаң хатӆ постаман – ляль харан уӆам хоятӆув нумаӆмиӆув
Курк тыӆась хольмаң пеӆа хуӆмет хатаӆан ёх хоятӆув емаң хатӆэӆ постаӆэӆ. Си хатаӆан кашң служитты похата, СВО хося уӆты хоятӆува па ёх хоятата мойӆапса ясаңан ястаӆув. Тумтака уӆаты, нынан шавиман таяты.
Хон мувеван ин антом шеңк ям пора, ёх хоятӆув СВО хося уӆӆат, ант паӆтаман ляль харан лялясӆат, хон мувев сайӆаӆат.
Си еӆпийн энамты похӆув служитты порайеӆ, ляль порая питыӆысат. Сит Афганистан па Чечня муватан манам ляльңан. Си паӆтап ляль эӆты туп нэпек па кино эӆты уятӆув.
Афганистан муван яртъяң таӆ сыс ляль маныӆыйс. Советской Союз хон мувев эӆты ветхосьяң сёрс энамты няврэм сита парас. 1989-мет таӆан солтанат Афганистан хон мув эӆты ёхи тусайт. Там мосванан, курк тыӆась ветхосьяңмет хатаӆан няӆъяң пеӆа ветмет таӆ постаса, хоты си ляль етшас.
Си юпийн Чечня муван ляль ус. Сит там уӆты пораев. Си ляль эӆты «уйтӆы ляль» ястаӆат. Сита кат пора сыс ляль маныӆыйс: 1994–1996-мет таӆан, 1999–2001-мет таӆан. Россия мувев эӆты сита па шеңк ар энамты няврэм ус. Туп Ӆорвош район эӆты нийӆъяң энамты пох маныӆыйс. Хоты ӆув сита ляляссат, муй арат энамты пох сита парас, ӆув воӆаң ант потарӆат.
Ин па, хуӆмет таӆ Украина муван ляль манаӆ. Округ хоятӆув па си тахайн уӆӆат. Зелёный Яр ай курт эӆты туп вет хоят вуса. Хой уятаӆ, муй арат хоӆна си ляль манты питаӆ.
Ханты похӆув си ляля па мантсат. Ёхӆы ант ёхтам хоятӆув па уӆӆат. Там мосванан Ӆоркурт эӆты Денис Николаевич Шапошников си лялян антома йис. Аңкеӆ-асеӆ, ийимеӆ па хуӆам няврэмаӆ утся хасьсат.
Кашң си тахаян уӆты хоят, муң ляльӆы уӆты ураңеван лялясаӆ. Муң ӆув эӆтаеӆ нумты, ханшты па няврэмӆува симась паӆтап лялят эӆты потарты па альты питӆув.
Альбина Тырлина ханшам потар
Авторы
Лух Авт
Темы