Лух Авт
Емаң рэп монщат
Щимащ нэмаң ӆуңтап Вячеслав Кондин ханшас па эсӆас. Ас потты тыӆащан «Торум Маа» музейн там ӆуңатты нэпек альты щира уйтантапса ус.
Вячеслав ар таӆ «Торум Маа» музейн рупитмаӆан монщат ханшты питас. Там нэпекан ханшман уӆ, муй щирн Ёмвош и емаң рэпан хатнэхуйт монщ войт пиӆан уӆӆат.
Вячеслав каматса ясаң щит эӆты ястас: «Емаң рэп монщат» нэпекема Ас-угорской научной институтан рупитты нэ Наталья Жеманская хорамаң хорат ханшас. Ма ӆувеӆа потартсам, муйсыр хор кашң лопасан ханшты мосаӆ, ӆув щиты верас. Ӆув хорӆаӆ эӆты киникаем хорамаңа йис, щишн Натальяя ун пумащипа ястаӆам».
Шоши мир литература ӆэрамтты нэ Виктория Сязи ястас: «Киника этты вер — щит иса ун амат. Ин ханты ху Вячеслав Кондин рущ ясаңан ханшам нэпек этас, муң урңева ищи ун амат. Ма ӆув ханшам отӆаӆ мет сыры соцсетят хоща вантсам, умща йис, муй щирн ӆув сора ханшаӆ. Ин ханты па охаль мир литературайн шимаӆ хоят няврэм ураңан ханшаӆ. Катра порайн Таисья Чучелина, Галина Слинкина, Мария Вагатова ханшсат, ин нэмоӆты хоят ант ханшаӆ. Ӆув онтасаӆан яӆпа щи вер ӆыӆңаптас. Ванты, мет оӆаң вошаң уӆапса эӆты монщат ханшас, щита хатнэху войт пиӆн потартаӆ — щит ищи умащ — щит ханты па охаль мирңан литература ураңан яӆап вер. Вячеслав Юрьевич, еӆӆы ищиты умща ханша!»
Няврэмат ураңан мет умащ потрат — щит антетан-ащетан монщам монщат. Ванты, ӆув уйтӆат, муй няврэмата мет умащ, муй ӆув туса хуӆантӆат. Умащ ки, ӆув еӆӆы монщты вохты питӆат. Югра мув няврэмат «Емаң рэп монщат» ат умащӆыӆэӆ!
Людмила Шульгина ханшам потар
Авторы
Лух Авт
Темы