Лух Авт
«Ёмвош ёх» араӊ мохиӆув
Там ванан «Ёмвош ёх» ханты мирэв арат арыты тахаев Ёмвош творчества хотъятн 7-мет таӆа ювам емаӊ хатӆаӆ хорасаӊа постасӆы. Тамащ умащ муй хорамаӊ нэм там арыты тахая яӊхты нэӊат нэман ӆыеӆа вусат. Ванта, ӆый иса хоӆыена Ёмвошн уӆӆат, щаӆта па Ёмвошев округ хоща хон воша ӆуӊтасӆ.
«Ёмвош ёх» тахая ханты арат арыты яӊхты нэӊата тамхатӆ аратэӆн иса яӊ нэ уӆ. Мата хоятат туӊа-щира па туса шоши ёхӆув уӆты-хоӆты щират, арсыр поры верат ошаӊа-щащаӊа муй рут мирэӆ ясаӊ ищиты щи япсыена уятӆат.
Ӆый тамхатӆ матты ипуляӊа уӆты хоттэӆ хоятат и тахая хоӆыена актащсат. Ӆуӆан ханты мирэв йис арат еӆӆы тайтыя па мосты порайт ёхатты кемн, щи отат сыр-сыр вошаӊ мир ху ёхат-нэӊат еӆпийн япсыена арыты па ванӆтаты. Мосаӆ ястатыя, хоты «Ёмвош ёх» ханты мир арат арыты хота арсыр тахаятн, Ёмвош ӆоватан рупитты муй пенсия вуш унты ёхтам имет ияха ёхатсат. Ӆуӆан Ас потты тыӆащ 2018-мет таӆ вуш эӆты ханты мир арат яма еӆӆы туты.
«Ёмвош ёх» арыты таха кущая Фаина Павловна Иштимирова (Костина) тата уӆ. Ӆув ар таӆ сыс «Хатӆые» нэмпи театр хоща Ёмвошн рупитас. Тата ма ӆув пиӆэӆн уйтантысам па оша понтсам, хоты па хун ӆый «Ёмвош ёх» арыты таха ӆэщатты номасн ёхатсайт.
Фаина Иштимирова щи вер эӆты тамиты манэма потартас: «Мет оӆаӊан, ма, ванта, Ас-угорской «Хатӆые» театр хоща 19 таӆ сыс иса усам, рупитсам. Щи порайн нумасты питсам, муй вер ураӊан муӊ щимащ таха ант тайӆув, хота ӆуӆан рут ясаӊан ханты арат япсыена арыты верытсув. Щиӊанща Ас хаӆты тыӆащн 2018-мет таӆэвн ма па Людмила Гурьева (Шульгина) япсыена ияха нумассаман, муй щирн щимащ арыты таха пуншты рахаӆ. Щаӆта муӊ ханты мирэв арат арыты каш тайты нэӊат ияха акатсаман, ӆый пиӆэӆн туса потарсаман, айӆтыена арсыр ханты арат Ёмвошев творчества хотъятн яӆпа утаӆтыты питщасув. Щи вушат эӆты па ин тамхатӆ унты «Ёмвош ёх» арыты тахаев нэӊат арсыр уйтантопсаята куща ёхӆувн кашӊ пуш вохты питсайт».
Ёхи хащам пораятн округев хоща постаты сыр-сыр емаӊ хатӆатн, щит: Тыӆащ поры, Вуӆэӊ, хуӆ па вой веӆпасӆаты ёхӆув муй Ворӊа хатӆ, ай хопаӊ касапсаятн. Мувтэӆ шоши мир хатаӆн па отатн иса щи уӆӆат па умащ якты муй арыты хотат хоятат еӆпийн иса туӊа-щира, яма ӆэщатӆат.
Щиӊанща «Ёмвош ёх» нэӊат 7-мет таӆа ювам емаӊ хатӆэӆ ураӊан якты па арыты хотэӆ ияха актащам вошаӊ хоятат еӆпийн туса версат. Оӆаӊ кутэӆн ӆый «Ван рутат» нэмпи ар арысат, мата от Тамара Пырысевайн катра Ӆорвош районан ханшса. Ванта, Овс мирэв ай па щимащ верат ураӊан кашӊ ханты ху па нэ ӆый кутэӆн ищипа ван рутата-щирата ӆуӊтасӆат. Щи туса манам ар етшаптамеӆ юпийн етнхот верам нэӊат Ёмвош творчества хот куща ӆаӊкар хоята Игорь Билаша ясаӊ масат. Ияха ёхтам хоятат еӆпийн ӆув потартас:
– Ешак ху ёхат па нэӊат! Манэма тамхатӆ шеӊк умащ щи вер, хоты ар хоят муӊ творчества хотъятэва там етнхота «Ёмвош ёх» арыты таха емаӊ хатӆэв постатыя ияха тата актащсат. Ӆаӊхаӆам ястатыя, ӆуӆан арыты тахаев нэӊат еӆӆы ищи тумтака, таӆаӊа ат усат па муӊев ханты мир умащ аратн аматсат!
Ясӊаӆ тувам юпийн Ёмвошаӊ творчества хот куща ӆаӊкар ху Игорь Билаш «Ёмвош ёх» ханты арат арыты таха куща нэӊа Фаина Иштимировая ишакты нэпек катӆаптас.
Мосаӆ ястатыя, хоты етнхотн порайн «Ёмвош ёх» таха арыты нэӊат аратэӆн ӆапат ар емаӊ хатӆэӆ ураӊан тата арысат. Ванта, ханты мирыев ӆапат туром тайӆ, Ёмвошев па ӆапат емаӊ рэп ӆоӊӆатн йис порайт вуш эӆты япсыена щи омасӆ! Щаӆта ӆапат таӆ ӆоватаӊа там кутн ханты нэӊӆув «Ёмвош ёх» нэмпи арыты тахаев па тамхатӆ йис!
Владимир Енов ханшам потар
Авторы
Лух Авт
Темы