Лух Авт
Ёмвошан ӆохан хатэмисат
Хасям ӆапатан Ёмвош округан ӆохан хатэмиты па пошкан эӆты орытты Хон мув чемпионат манас. Россия мув суӊат па Белоруссия мув эӆты ёхтыӆыйм 185 хоят няӆ хорпи касты ятан юращсат.
Там таӆан хон мув касапсайт етшаты унты, касты хоятат хоӆна Ёмвош юпийн Мурманск вошан уйтантыӆат. Си юпийн, туп яӆап таӆан манты касапсаята ӆэсятыты питӆат.
Шоши мув касты хоятӆув кашӊ порайн ӆохан хатэмиты па пошкан эӆты орытты хон мув касапсаята яӊхӆат. Ёмвошан, там манты уйтантопсайн Полина Плюснина спринт хухатӆымаӆан, оӆаӊ тахая этас, сорнеӊ пос шитас. Кимет хатаӆан муӊ нэӊиев гонка преследование хося хуӆмет тахая этас, патарох меваӆ пос шитас. Ёх хоятӆув си касапсаятан нэмоӆты тахая ант этсат.
Ма сита Полина Плюснина пиӆан уйтантысам па потрэмисам. Ӆув каматса ясаӊ ястас: «Ма 2024-мет таӆан ӆохан хатэмиты па пошкан эӆты орытты Ямал мув командая муӊев ӆэсятты хоятэван Максим Максимован вохсайм. Ма Мордовия мув эӆты ёхатсам. Асем — Виктор Анатольевич Плюснин, тренера уӆ. Добрянской ДЮШ няврэмат пиӆан рупитаӆ. Ӆув манэм па апсем ӆохан хухатӆыты утаӆтасӆы.
Яӊ таӆ эӆты ӆохан хухатӆыты па пошкан эӆты орытты питсам. Хон мув командая нийӆхус таӆан вусайм. Нэӊат сборная кат таӆ ӆуӊтасӆам. Па мир касапсаята ант яӊхиӆысам. Там таӆан ма хон мув ар вошатан кассам. Оӆаӊ, кимет, хуӆмет тахаята этӆысам. Там касапсайн оӆаӊ па хуӆмет места усам.
Манэма шеӊк умась округ командайн рупитты. Шеӊк аматсам, хун тохи вусайм. Округ касты хоятӆув хоӆ па регионат эӆты ёхатман уӆӆат. Юниорской командайн иса Ямал муван уӆты няврэмат касӆат».
Альбина Тырлина ханшам потар
Авторы
Лух Авт
Темы