Лух Авт
Энамты няврэмат тусӆаӆ альсат
Хасям ятан Москва вошан манам «Сокровища Севера» фестиваль-вантопсая оӆаң пуш Хон Петра вошан Герцен нэмпи институтан утаӆтыты няврэмат ёхтыӆысат. Анна Нахрачёва, Николай Цуркан па Галина Дунаева эӆты потрэм туӆэм.
Си няврэмат Овс мув институтан утаӆтыӆат, «Увас Хус» группая якты яңхӆат. Там уйтантопсая якты утаӆтыты нэ Зоя Степановна Рябчикова хуӆамхосьяң няврэм тутӆыйс. Фестивалян эвет па похат хуӆам як яксат, «Ворңа хатӆ» вантопса альсат, ханты сох ӆуматман, шушсат па этаӆтысат.
Вантопсайн институт хар верман ус. Сита няврэмат пиӆан рупитты хоятат усат. Тохи яңхты рахас, потрэмиты, инсясты. Няврэмат рупатайт этаӆтысайт: хорат, аканят. Ханты няврэмат верам ху па нэ аканят па усат.
Хасям таӆ эӆты энамты ёх ун вантопсаята тутӆыты питсайт. Институтан ӆэсятты фестивалятан, Хон Петра вошан манты Экономической форуман, «Реальность Этноса» уйтантопсайн волонтёрата уӆӆат, ашкуӆаятан, нэпек ӆуңатты хотатан шоши мир ёх эӆты потарӆат, якӆат, арыӆат, няврэмат ураңан мастер-классат верӆат.
«Увас Хус» группайн якӆаңан
Галина Дунаева Свердловской область Пышма курт эӆты ёхтас. Ясңаӆ эӆты: «Ма хуӆмет курсан этнофилология специальность хуват утаӆтыӆам. Тамась тахая оӆаң пуш ёхтыӆысам. Тата ма «Вонсяпса», «Тут» як яксам. Институт эӆты ар тахаята яңхӆув. Шоши мир уӆапсаев этаӆтыӆув. Муң Зоя Степановна па хасям курсатан утаӆтыты эвет пиӆан якӆув ӆэсятӆаӆӆув».
Николай Цуркан Хон Петра воша Ёмвош эӆты утаӆтыты ёхтас. Каматса ясаң ястас: «Ма ханты. Аңкем рутат Сумат район Тугиан курт эӆты уӆӆат. Аңкаңкем — Дарья Деомидовна Себурова. Ун асем — Илларион Николаевич Гришкин.
Ма ёх хоятӆам пиӆан «Увас Хус» якты группа акатсув. Группаева ар пелак Ёмвош округ ханты па охаль няврэмат яңхӆат. Там уйтантопсайн мин кат хоятан «Ёх як» яксаман».
Сэма питам муваӆ
Анна Александровна Нахрачёва няӆмет курсан Овс мув институтан педагогической отделенияйн рущ, рут ясаң па литература утаӆтыты нэңа утаӆтыйӆ. Утаӆтыты пораеӆ эӆты потар тус: «Ма Суматвош районан Теги вошан энапсам па утаӆтысам. Рутӆам Ӆорвош район Касам-Нёӆ курт эӆты. Ма хантыя манэм ӆуңатӆэм. Аңкаңкем охаль нэ — Анна Максимовна Санмендалова. Асикем Тэк вош ханты — Виталий Дмитриевич Миляхов. Ун аңкем ур нэ — Анна Ильинична Зотова. Ун асем Ӆорвош ханты, Касам-Нёӆ курт эӆты — Анисим Александрович Нахрачёв».
Хорам хорат ханшты эви
Там мосванан института Любовь Юрьевна Попова рупитты ёхтас. Ӆув Овс мувев эӆты хорат ханшаӆ. Аркадий Иванович Гашилов 75-таӆ емаң хатӆа постам уйтантопсайн Аня ханшам хорӆаӆ этаӆтысӆы. Сита утаӆтаты нэңан хорӆаӆ шияӆасайт, ӆув хосяйӆ утаӆтыты вохсаӆӆы.
Аня сит эӆты па каматса ясаң ястас: «Утаӆтыты тумпийн, ма Любовь Юрьевна хося хорат ханшты яңхӆам. Яӆап таӆ тыӆась эӆты хуӆам яӆап хор ӆэсятсам. Ӆув манэма ястаӆ, аляӆ, хоты яма хорат ханшты, ӆэсятты.
Ма ай пора эӆты хорат ханшӆам. Аңкаңкем хося таӆаң ӆарась уӆ. Яртъяң класс етшамем юпийн, нэпекӆам туса вератты Овс мув няврэмат Центр искусств тахая мийӆысӆам. Сита утаӆтыты утсисам, ант вусайм. Сишан бухгалтера утаӆтыты мантсам. Таӆ туп рупитсам. Си юпийн Хон Петра воша мантсам.
Няӆхосьяң таӆ эӆты хоятат хорат ханшӆам. Нэмоӆты хоятан ант утаӆтасайм. Ашкуӆайн рупатайӆам конкурсата китыӆысайт. Ма уятсам, муй ма ханшты ӆытӆайм, туп хоты, ант уятсам. Хон Петра вошан ар хорпи хорат ханшты кружоката яңхсам. Хун Любовь Юрьевна пиӆан уйтантысам, мохты моштасэм, муй манэма мосаӆ.
Хорӆаман ма шоши мир уӆапсаев альӆам, ханшет этаӆтыӆам. Манэма хорасат (образы) йиӆат, ма ӆувиӆаӆ яха акатӆаӆӆам па хора ӆэсятӆаӆӆам. Ма ин ханты нэ мир эӆты хорат ӆэсятӆам. Еӆӆы, па стиль хуват ханшты утсиӆам па институтан вантопса верты.
Утаӆтыты етшаты юпийн, ёхи манӆам, ашкуӆайн рупитты питӆам. Хоӆна магистратурая утаӆтыты манты утсиӆам па институтан рупитты хасьты».
Альбина Тырлина ханшам потар
Авторы
Лух Авт
Темы