Лух Авт
Ёра вер туты нэ
Ас нопатты тыӆащ хольмаӊ пеӆа хутмет хатаӆан ёрая рупитты па тынасты ёх емаӊ хатӆэӆ постасэӆ. Там йисан, щимащ рупата хар пуншты па еӆӆы туты ураӊан арсыр нётапсайт уӆӆат. Рупата пунштыйн, утаӆтаты па нэпекат щира ӆэщатты хоятат па уӆӆат. Туп пирыйм вер мосмаӊа тайты мосаӆ.
Щимащ хоятат кутан Оксана Бурхоновна Хасанова. Ӆув шоши мувеван охшамат, щашканат, нуйт па ёнтасты хорамат тыныйӆ. Емаӊ хатӆат верты харатан иса тынасты этӆыйӆ. Хоят пеӆа шеӊк самаӊ па потраӊ нэӊие.
Тащ хотатан, хуӆ веӆпасӆаты панатан па ай куртатан уӆты нэӊата тамащ тахайн ӆутасты мет ям. Шеӊк ун онтас туӆ. Ӆапкайт каншман вош хуват шушиӆыты ант мосаӆ.
«Ма ай тэӆан там муван энампсам. Овкурт ашкуӆайн яӊ класс етшаптасам. Ащем узбек, щит ураӊан опращ нэмем щимащ. Аӊкем ханты, щитэман ханты ясӊев, ханты уӆапсаев яма уятӆэм.
Утаӆтымем юпийн, Пулӊават вошан уӆты хащсам. Тата ху сая мантсам. Кат эви тайӆаман. Еӆпи «Станция юных туристов» ашкуӆайн утаӆтыты няврэмат пиӆан рупитсам. Юхат «Крылышки» ай няврэмат хатӆ сыс яӊхты хота рупитты мантсам. Щита эвиет-похиет ӆохан яӊхты, касты па зарядка верты утаӆтаӆӆам.
Щи рупатаем тумпийн тынасты верэм туӆэм. Там рупатаеман ийикеман шеӊк нётӆайм. Щашкан па нуй сыхат ванты, шеӊк ӆавартат, аӆты порайн юр мосаӆ. Рупатаем самаӊа тайӆэм. Муй щашкан хоӆта ёнтӆа, щит па уйтӆам. Щит ураӊан мохты мосты пормас вуӆам.
Емаӊ хатӆатан хоятат яма ӆутасӆат. Пулӊават вошан ӆапка па тайӆам. Ӆапкаем «Мария» аӊкем нэман нэматсэм. Морт кеман хоятат тохи па ӆоӊтыӆат.
Ёра вер туты, шеӊк ӆаварт рупата. Тухаӆ хатӆатан турмаӆ ищки, таӆаӊ хатӆ каман ӆойман. Ерт порайн па пормасат морӆайт, щит па сораӆтты мосӆат. Там йис ар нэпек пиӆан ищи щёхлэмаӆа. Щи вер па уйтман тайты мосаӆ. Пормасӆам ӆутӆайт, щиты ки хоятата щит мосаӆ. Анта ма ки, матты па хоят тамащ рупата ӆуӆан тус», — Оксана Бурхоновна ястас.
Муӊ па Оксана Бурхоновна пеӆа па ёрая вер туты хоятата мойӆапса ясаӊ китӆув. Кашӊ пормас ӆув хоятаӆа ат ликмаӆ. Тынӆан, ӆутасты хоятата па нынана, морт кеман ат уӆӆат. Нын туты рупатайн мосмаӊ па кен ат уӆ.
Зоя Куртямова ханшам потар
Авторы
Лух Авт
Темы