Лух Авт
Ернас ёнтты ураӊан арсыр рупатайт верты мосӆ
Щиты ястас мари мир ёнтасты нэ Эмма Анатольевна Семёнова-Гришкина — ӆув «Муро сем» («Ар сов») тахайн арыты, нарасты па ӆуматсох ёнтты нэӊа уӆ. Мин Марий Эл мув Моркинской район Шереганово куртан уйтантысман па потартсамн.
Ӆув 1965-мет таӆн мари мир семьяйн сэма питас. Айтэӆн аньтеӆ эӆты арсыр ими верата па ёнтасты утаӆтыйс. Рупата щирн ёнтасты нэӊа уӆ, щи вера утаӆтыйс.
– Ванты, мари мир ернас ёнтты еӆпийн арсыр рупата эӆты потартты ки, мет оӆаӊан товийн лён сэмат мува омасты мосӆ, щаӆта энмаӆты, сусн щит эватты, акатты, щаӆта лён торн эӆты щашкан верты. Муӊ щи патыйн нэман станок тайӆув. Ма аӊкаӊкем, щащем па аньтем эӆты щашкан верты утаӆтысам. Ин ма «Муро сем» арыты-нарасты тахаева яӊхты икета, имета, няврэмата мари мир хорамаӊ ернасат ёнтӆам. Ма, ванты, йис щирн ёнтӆам. Мет оӆаӊан катра пормасат ӆаваӆты хотатн вантсам, муй щирн катра порайн ёнтсайт. Тухӆ ишн имиӆув аньтиӆаӆ эӆты хайм ернасат тайӆат. Щи тумпийн па культура хотн кружок туӆам па эвет ёнтасты па па ими верата утаӆтаӆам. Муӊ уӆам якты таха эӆты хайм ӆуматсохат ищи ӆумтыӆыӆув. Щитат шавиман тайӆаӆӆув.
– Наӊ хун «Муро сем» тахая ёхатсан?
– Ма 2012-мет таӆ вуш эӆты «Муро сем» тахайн арыӆам па тумырн (мари мир барабан) нарасӆаӆам, щит Пётр Павлович Ячекин верас. Айтэӆн нумӆэм, муӊ семьяевн кашӊ порайн емаӊ хатӆатн муй торн сэварман арысат, щишн ма арыты вер пеӆа самаӊа энамсам. «Муро сем» таха ун хоятат хунты рутӆаӆ эӆты арат хоӆыена нэпека ханшсат, щитат ин арыӆув. Сергей Александрович Викторов пиӆн ванан уӆты куртат хуват яӊхиӆыӆув па йис арат диктофона па нэпека нох ханшӆув, щаӆта утаӆтаӆӆув па арыӆув. Куртата етнхот альман яӊхӆув, ӆувиӆаӆа умащ акмам арат хуӆантты.
– Аӆпа, наӊ ёнтасты нэ иты арсыр ванӆтопсэта яӊхӆан?
– Па муй. Ма рупатаем куща ху иса порайн манэм щимащ ванӆтопсэта китыӆыйӆ. Ванты, муӊ щита анта туп ёнтам ӆуматсохӆув альӆув, щи тумпийн утаӆтыты харат ӆэщатӆув, па ёх эӆты утаӆтыӆув. Марий Эл мувев — ун, щишн арсыр тахаятн еша па хорпи ернасат ёнтӆайт, туп кашӊ хоят ӆув итэӆа ёнтаӆ. Ванты, муӊ куртэва ики па район эӆты мари ими тус ки, ӆув щираӆн ӆуматсохат ёнтаӆ — муӊева имохты ныӆа, муйсыр мув суӊев эӆты имеӆ тусӆы.
Ванӆтопса порайн артаӆаты ёх туса нох вантӆат, муй щирн кашӊ ӆуматсох ёнтман уӆ. Ӆыв туса ёнтты имет пирыӆат, щаӆта ишакты нэпекат на тынаӊ мойӆапсайт мойӆаӆат.
– Нови щашкан эӆты ёнтам ернас — щит там йис щирн муй катра щирн ёнтам ернас?
– Йис пора вуш эӆты нови щашкан эӆты ӆуматсохат ёнтсайт. Ма хоӆна нумӆэм, муй щирн аньтем-ащем нови ернасатн торн сэварты муй па рупата верты яӊхсат.
Там йисн па ольпаӊ щашканат эӆты ернасат ёнтты питсув. Щи тумпийн имет арсыр хорамат тайӆат, ит — щит ший аршаш — щит нын ханты миран иты сак кеӆ хорпи хорам от, щита сак юкана ай охат ёнтӆайт.
Интам муӊ мувевн хуӆам студия хот рупитӆ, щита ох онтасн мари мир катра муй па там йис ернасат ёнтӆайт. Хунты Шоруньжа курта Марий Эл мувев культура верат туты министр ху Константин Анатольевич Иванов ёхтыӆыйс, мари мир ернас ёнтты партас. Ун кущайт рут мирэӆ ӆуматсохатн яӊхӆат ки, айӆат ёх ищи ӆыв пеӆаеӆ вантман тайты питӆат.
Ям арат таӆ ёхӆы режиссёр нэ Инесса Куляжева мари мир эӆты «Юмо хоща ма юшем» нэмпи кина верас. Ӆув муӊев вохсаӆы, муӊ щита мари мир уӆапса, йис верат, пойкщаты верат альсув, арысув, нарассув па яксув. Ма нумӆэм, щит ӆуӊ пора ус — йи хатӆан хатӆаӊ хатӆ ус, щаӆта ертаӊ хатӆ, еӆӆы аня лыптат щёрхатсат — хорамаӊ кина тыйс. Там кина Марий Эл воӆаӊ Йошкар-Ола вошн, еӆӆы Шоруньжа куртан кулуп хоща вантсув, ин Интернет хоща щи кина уӆ. Муӊ вохӆаюв ки, имохты яӊхӆув. Муӊ иса муй верӆув, ӆуӆн мари мир йис верат еӆӆы туты па няврэмат утаӆтаты.
– Нын «Муро сем» тахая яӊхты эвет-похат мари ясаӊ тайӆат?
– Па муй. Ёӆн аньтиӆаӆ-ащиӆаӆ ӆыв пиӆэӆн туп мари щирн потартӆат, щи тумпийн ашкуӆайн ӆапат сыс кат щёс «Мари ясаӊ» урок уӆ. Ӆыв рут ясаӊан потрат ханшӆат, еӆӆы экзаменат маӆат.
Людмила Шульгина ханшам потар
Авторы
Лух Авт
Темы