Лух Авт
«Ёшпатан най» вантопса пуншса
Хасям сютсяты хатаӆан Надежда Михайловна Талигина ӆапатъяңмет сэма питам хатӆаӆ постас. Шемановской нэмпи хотан «Ёшпатан най» нэмпи вантопса пуншса. Ӆухасӆаӆ, рутӆаӆ, ӆув пиӆэӆан рупитам ёх, вошаң ханты хоятӆув мойӆапса ясаң ястаты па мойӆаптаты ёхтыӆысат.
Надежда Михайловна Россия ӆоватан нэмаӆ шеңк вутнга сясяӆ. Ӆув хор ханшты нэ, этнограф, график, кандидат исторических наук, мастер декоративно-прикладного искусства, член Союза художников нэмат тайӆ. Ханшты хорӆал рут муваӆа па ханты хоятӆаӆа постаӆӆы.
Там вантопсайн ӆапатъяң рупата этаӆтаман уӆ. Хорӆаӆ хуӆам ята ортсаӆӆы: «Тэкаң ики ар», «Якты хот» па «Избранное». Хасям рупатайӆаӆ Юрий Вэлла «Избранное» ханшам нэпека ӆуңтарата па потрата ханшсаӆӆы. Рупатайӆаӆан аляӆ, хоты ханты хоятӆув мув хорас па турам пиӆан пиӆтащӆат.
Надежда Михайловна Геннадий Павлович Кельчин «Тэкаң ики ар» ӆэсятам нэпека хорӆаӆ ханшсаӆӆы. Рупатайӆаӆ эӆты Геннадий Павлович каматса ясаң ястас: «Хорӆаӆ торӆы потра рахӆат. Ситы ки ант ус, муй сирн катра ханты ёх уӆапса уйтсэв ӆуӆан. Русь хоятат, хатанят си хорат вантӆат па ястаӆат: «Я-а, ханты хоятат нэш ӆарэт таймеӆ, няшет паятты хошмеӆ, аӆты кешетан лялясмеӆ, шепан сир таймеӆ!» Наң куш ясаң ант уйта, туп ванты па уйты, там ханты хоят уӆапса, уӆапса сират, хотат, верат Надежда Михайловна ханшам хорат хуват иса ныӆайт».
Си вантопса Ас потты тыӆась ӆапатхосьяңмет хатӆ эӆты ван хатӆап тыӆась яңмет хатӆ унты манты питаӆ. Кашң хоят хорат вантты яңхты верытаӆ, няврэмӆаӆа па хиӆыӆаӆа хоратан этаӆтыты ханты уӆапса альты.
Альбина Тырлина ханшам потар
Авторы
Лух Авт
Темы