обновлено: 13:18, 20 октября 2025
Лух Авт
Еӆӆы вуратман па утаӆтыман уӆты мосаӆ
Мосванан ханты мирэв эӆты Иван Эдуардович Сандрин «Овс мув шимӆаӊ мир хоятат. Общественной дипломатия ашкуӆа» нэмпи программа хуват Москва воша яӊхас. Щий пиӆтащийм хуӆамсоткем хоят эӆты нийӆхус пирыса яӊ регион эӆты.
Хоты там воӆаӊ уйтантопсаята пиӆтащиты рахас, щит эӆты Иван Эдуардович муӊев ясаӊ верас. Номас понтсам там вер эӆты ханшты, ӆуӆан, муӊ энамты няврэмӆув ант паӆман па еӆэмаман манты уйтантопсаята, касапсаята ищи ат яӊхиӆыӆат, мосты нэпекат китыӆыӆат. Йи пуш ант ки тыйӆ, кимет пуш па вуратты мосаӆ, ёш ант эсаӆты, лик сох ант тайман па еӆӆы хатты.
– Там «Общественной дипломатия ашкуӆа» таӆ шуп моӆтас ус. Мет оӆаӊан, хой ӆытас, верытас заявкайт верты. Щишн ма там таӆан курк тыӆащан мосты нэпекат китсам. Хуӆамсот хоят щимащ заявка версат. Щи китам мосты нэпекат онтасан муӊ видеоконференция щиран утаӆтысув, хуӆатсув. Шимӆаӊ рут мир хоят щиран законат хуӆатсув, муй щиран па хоты мир мув ӆоватан уӆӆат. Россия мувеван хоты ищи шоши хоятӆув уӆӆат. Каматса тыӆащ щиты дистанционно утаӆтысув.
– Щаӆта па аратаӆ веран хоты манты питас?
– Оӆаӊмет этап етшаты юпина тестирование верса. Ӆувеӆ ханшсэв. Щи щиран ныты питса, хой ямашак ханшсаӆӆы, хой атмашак. Щи юпийн ныты питса, хой еӆӆы утаӆтыты питаӆ. Ущ тыӆащ кеша хольмаӊ хоят тохи питас, хольмаӊ пеӆа вет регион эӆты.
Кимет этап манам порайн муӊ Ёмвош муван актащисув. Мет оӆаӊан Сургут вошан. Щи юпийн Ханты-Мансийск вошан. Щита ӆапаткем ищи утаӆтысув, усув, вантсэв, хоты Ёмвош муван шимӆаӊ мир хоятат кеша нётопсайт закон щиран верӆайт. Хоты щита шоши хоятат уӆӆат: хой вуӆы энмаӆтаӆ, хой хуӆ веӆаӆ. Щаӆта кимет уйтантопса юпийн итоговой тестирование ус.
Ёмвоша яӊхмев юпина щи тестирование версэв. Кашӊ хоят интернет хоща ӆичной кабинет тайӆ «Общественной дипломатия ашкуӆа» сайт хоща. Щишан щитэв ханшмем юпина ма па еӆӆы питсам. Щи юпийн нийӆхус хоят еӆӆы мантсат, финала. Финал — щит хуӆмет ят ус. Там сусан муӊ Москва вошан актащисув. Щёхар тыӆащ 28-мет хатӆ эӆты ай тахайт потты тыӆащ 8-мет хатӆ унты щита муӊ ищи утаӆтысув. Уншак тахаята тутӆысаюв, хота законат ӆэщатӆайт, хоты верӆайт. Министерство иностранных дел хоща яӊхсув, щита потарсаюв, хоты ООН хоща шимӆаӊ мир рут хоятат уӆапса вантман па сайӆаман тайӆа. Муй хорпи нётопсайт мир ӆоватан верман уӆӆайт, щит эӆты иса мир ӆоватан потарӆа.
Щаӆта «Дом народов Росси» хоща тутӆысаюв. Щи юпийн Российской Федерация хоятат уӆапса па ӆыӆ сайӆаман уӆты аппарат хоща яӊхсув. Щаӆта Федеральной агентство по делам национальностей хоща па тутӆысаюв. Воӆаӊ вошеван «Норильский никель» воӆаӊ рупата хот уӆ, ӆув ищи шимӆаӊ рут мир хоятат пиӆан рупитӆат. Ищи ун онтас верӆат. Артан щит Таймыр мир хоятат пелак нётопса тувман уӆӆат.
– Моӆты тахаятан па усты?
– Арпелак тахайн утаӆтысув, ӆув кутэӆан МГИМО хоща. Утаӆтасаюв, хоты мосаӆ ар хоят еӆпийн потарты, хоты нэпекат туӊа-щира ӆэщатты мосӆат. Хоты мосаӆ потрэмиты. Хоты мосаӆ ӆэщатыты, хоят еӆэмӆа ки. Мосаӊ потарты ант верытаӆ, ант хошаӆ — щиты утаӆтысаюв.
Юхат ищи ун итоговой тестирование ус. Щи щиран йи хоят нох питас. Кузбасс эӆты, шори нэмпи шимӆаӊ мир рут хоятат эӆты — Юлия Уварова. Щи тумпийн нийӆхус хоят ӆаурета этсат. Ӆув кутэӆан ма ищи щий питсам. Образовательной сертификататан мойӆаптасаюв. Щишан щи сертификат щиран рахаӆ еӆӆы утаӆтыты, посатты. Щиты ма утаӆтыты яӊхсам.
– Муй ӆуӆан наӊ энамты няврэмӆува ястасан?
– Муӊ шоши энамты ёхӆува, хантыӆува ястаты вутщиӆам, еӆӆы ат вуратӆат, еӆӆы утаӆтыӆат. Ин там йисан ант ки утаӆтыӆан, еӆӆы хоты уӆты питӆан? Иса утаӆтыты мосаӆ. Хой айшак, хой уншак хоята — иса утаӆтыты мосаӆ. Яӆап нэпекат ӆуӊатты, яӆап законат ӆуӊатты — муй щиран рахаӆ уӆпасаев кенашак верты. Хоты муӊ ванан уӆты хоятӆува нёттыя. Хой уншак институтан утаӆтыйӆ, хой общественной рупатайт щиран еӆӆы манаӆ. Щишан хой еӆӆы щиты нумасаӆ, нохӆышак вуратты нётоп шоши хоятӆаӆа верты, мосаӆ еӆӆы утаӆтыты. Ант ки утаӆтыӆан, хоты еӆӆы мантыя? Щишан, энамты ёх ашкуӆайн яма ат утаӆтыӆат, щаӆта колледжатан, институтатан. Еӆӆы ат нумасӆат.
Аллина Тоярова ханшам потар
