Лух Авт
Финно-угор айӆат ёх уйтантопса верыӆыса
Хащам ӆапатан Марий Эл Республикайн финно-угор айӆат ёх III Всероссийской форума актащисат. Щий 32 мув суӊ эӆты мохет ёхтыӆысат. Катсот ветъяӊ моӆтас общественной организация, экспертной па научной сообществайт, айкеӆ туты хоятат, кущайт, няврэмат утаӆтыты, рут ясаӊ туты, каш харатан рупитты хоятат пиӆтащисат.
Российской Федерация Президент Владимир Путин ёхтам хоятата мойӆапса ясаӊ китас, хой финно-угор мир Всероссийской форума па «Ассоциация финно-угорских народов» съезда ёхтас.
«Сот таӆатан финно-угор мир ёх ун онтас муӊ хон мувев туӊа-щира уӆты ураӊан туӆат. Там хатӆатан аратаӆ мир актащас потар туты щит эӆты, хоты сахат еӆӆы энамты няврэмат пиӆан рупитты мосаӆ. Харат вертыя, хота ӆуӆан няврэмат ӆаӊхаман актащисат, еӆӆы рупата уйтты па рупитты харат ӆэщатты. Щи тумпийн па сама рахты мосмаӊ верат альты», — щит эӆты китам ясаӊан Кремль сайтан ханшман ус.
Ямал мув эӆты щий «Ямал — потомкам!» Ассоциация, НКАХ «Пулӊават», «Изьватас» общественной движение, Овс мув шимӆаӊ мир верат туты департамент хоща ӆоӊам хоятат яӊхсат. Потар версат, муй хорпи рупата Ямалан верӆа ясаӊ шавиты па еӆӆы туты ураӊан, муй хорпи касапсайт, ёнтопсайт, йис верат аӆамты ураӊан верӆат. Хантэт национально-культурной автономия «Пулӊават» куща нэ Светлана Тайшина потартас Канащ Пухаӆан уӆты этнопарк рупата эӆты.
Атэӆ похлатан актащийм порайн «Яндекс» хоща рупитты хоятат потарсат, муй хорпи рупата верса шоши мир ясӊат яндекс-переводчик хоща ӆоӊаӆты ураӊан. Ханты ясаӊ тохи ӆоӊаӆты ураӊан ин рупата Югра па Ямал муван манаӆ. Щи кеша пирыйм хоятат воӆаӊ рупатаеӆ онтасан щаха интернет мохты туӊа-щира ясаӊӆув ханшты верытӆаӆӆув.
Тамащ уйтантопсайт шеӊк мосӆат. Ванты щи порайн арсыр воӆаӊ таха эӆты хоятат пиӆан уйтантыты рахаӆ. Муй хорпи верат па мир хоща манӆат, муӊ мувеван ищи еӆӆы туты верытӆаӆӆув. Па муӊ ямшакев ӆув па вуӆэӆ.
Аллина Тоярова ханшам потар
Авторы
Лух Авт
Темы