Лух Авт
Финно-угор ханшты ёх уйтантопса
Щёхар тыӆащ хащам хатӆатан, финно-угорской ӆуӊатты нэпек ханшты мир ёх няӆмет пуш верты уйтантопсая вохиӆысайт. Хув тэӆан ханшты, потрат, ӆуӊтарат па мир ясӊа кератты ун хоятат, щаӆта па веӆщишак ханшты питам айӆат ёх Мордовия, Удмуртия, Марий Эл, Карелия, Саран мув, Пермской мув сыӆ, Югра па Ямал эӆты Ёмвошан яха уйтантысат.
Уйтантопса пуншам порайн, нэпек ханшты воӆаӊ хоятат вуща ясаӊ ястасат. Юхат, сот моӆтаскем яха ёхтам ёх, арсыр секцияйт хоща, еӊта пасан суратан, мойӊ хоятат па няврэмат ещаӆт ӆув ханшам рупатайӆаӆ эӆты потар тусат.
Муӊ округев эӆты хуӆам ханты хоят тохи яӊхас. Зинаида Викторовна Лонгортова па Валентина Даниловна Вакуленко хув пора эӆты ханты па рущ ясаӊан потрат па ӆуӊтарат ханшӆаӊан. Айӆат ху Иван Эдуардович Сандрин ван потар шупиет нэпека акатаӆ па ханты газетайн рупитаӆ.
«Тамащ уйтантопсая ма кимет пуш ёхтыӆысам. Оӆӊа аӆ щиты хуӆантсам па вантсам. Тампуш па ханшам потар шупӆам тый тутӆысӆам. Ма хорпем веӆщи ханшты айӆат ёх, ӆэщатам потарӆаӆ ошаӊ уншак ханшты хоятата альсаӆӆаӆ. Там уйтантопсайн муӊ утаӆтасаюв па ястасаюв, хоты па маты ханшам потарӆув ямашак ӆэщатты мосӆат. Кашӊ хоят моӆты порайн рупата веӆщи верты питыӆыйӆ. Хота мохты тыйӆ, хота еша ёвра манаӆ. Хоят уӆтаӆ хуват иса щи утаӆтыйӆ. Ванты, тамиты утаӆтыман, ошаӊ номпсат, потрат хуӆантман, айӆат ёх еӆӆы ханшты уратты питӆат», — Иван Эдуардович ястас.
Зоя Куртямова ханшам потар
Авторы
Лух Авт
Темы