Лух Авт
Горка вош совхозан рупитты хоятат
Хуӆ веӆты ёх ӆуң веӆпасӆаты порайеӆ Ас потты тыӆасян си етшаӆ. Горка, Асов, Ӆорвош па Ӆоркурт хуӆ мосятты хоятат Горковской рыбозавода ӆуңтасӆат. Горка воша ӆуңтасты хуӆ мосятты хоятат па Питӆор вуӆы ёх Горка вош совхоза ӆоңаӆман уӆӆат. Ӆув кутэӆан Хашкуртаң па Ӆаңкивошаң хуӆ веӆпасӆаты ёх.
ООО «СП «Горковской» сельхозпредприятие куся ху Руслан Георгиевич Саенко каматса ясаң верас: «Муң совхозэва хуӆ веӆпасӆаты па вуӆы шавиты хоятат ӆуңтасӆат. Там хатӆа, няӆ тыӆась сыс, Ас нопатты тыӆась эӆты унт ӆор тыӆась унты, ӆапатъяң тонна хуӆ мосятсув. План хуват сот хус йи тонна маты мосаӆ. Ма нумасӆам, таӆ хасьты унты планэв тэкаптаӆэв. Си порайн муң субсидия охат шитӆув. Йи килограмм мийм хуӆ ураңан сот яң соӆкува сохаптаӆа.
Штат сирн яң хуӆ веӆпасӆаты хоят рупитас. Там хатӆа ӆув хоӆ пенсияйн уӆӆат, сютсяты мантсат. Хашкуртаң хоятат кутан — Леонид Семёнович Тырлин, Виктор Гаврилович Тырлин, Дмитрий Гаврилович Тырлин, Мария Гавриловна Тырлина, Мария Александровна Тырлина. Ӆаңкивошаң хоятат хоӆна рупитӆат. Сит — Сергей Егорович па Владимир Егорович Нялимовңан, Юрий Кузьмич Тояров, Юрий Владиславович Тырлин, Владислав Гаврилович Тырлин. Игорь Ильич Русмиленко, ӆув пенсияя па манас, ӆуңан хоӆна ноптаӆман рупитаӆ. Хой штат сирн ант рупитаӆ, мосты нэпекатан ӆэсятӆаӆӆув.
Хашкуртаң, Ӆаңкивошаң, Ӆорвошаң, Посӆоваң — Носкинат товийн-ӆуңан ноптаӆӆат, Хушавтаң — Горка вош хуӆ мосятты хоятат совхоза ӆуңтасӆат.
Сергей Маратович Тырлин, Мария Прокопьевна па Евгений Маратович Тырлинңан, Михаил Юрьевич Контеров, штат сирн рупитӆат.
Хуӆ мосятты хоятат тумпийн совхозан вуӆы тащан яңхты хоятат рупитӆат. Няӆ Питӆор бригада, няӆъяң пеӆа кат хоят. Хоӆ Питӆор курта ӆуңтасӆат: Питӆор хоятат, Ӆорвош па Катравош эӆты вуӆы ёх хоятат па уӆӆат.
Там таӆан план хуват хольмаң тонна вуӆы нёхи маты мосаӆ. Хоӆна нийӆхус тонна нёхи ӆутты ураңан нэпекат ӆэсятсув. Питӆор куртан нёхи ӆэсятты таха тайӆув. Ас потты тыӆасян хасям хатӆатан вуӆэт хорӆув па нёхи ӆэсятӆув. Вуӆы нёхи: нёхи ӆов пиӆан, ӆовӆы нёхи па фарш Ӆорвош районан уӆты садиката, ашкуӆаята, леккар хотата китӆув. Совхозан вет сёрс катсот вуӆы ӆуңтасаӆ. Вуӆы тащан яңхты хоятат рупитты ураңан охан сохаптаӆӆув, вуӆы нёхеӆ маты тумпийн.
Хуӆ веӆты па вуӆы ёх емаң хатӆаңан мойӆапса нэпекан па охан рупитты хоятӆув сохаптаӆӆув. Тампуш хуӆ веӆты ёх емаң хатӆэӆ Хашкуртан постасэӆ. Си еӆпийн Ӆорвошан па Горкийн верыӆысайңан».
Хуӆ веӆты па вуӆы тащан яңхты хоятӆув тумтака ат уӆӆат, хоӆапӆаӆ ар хуӆан ат хойӆайт, вуӆы тащӆаӆ аршака ат йиӆат, рупата охӆаӆ ат эӆатӆайт.
Альбина Тырлина ханшам потар
Авторы
Лух Авт
Темы