обновлено: 12:12, 15 октября 2025
Лух Авт
Ханты автономияя яӆап куща пирыса
Хащам ӆапатан Пулӊават хантэт яха ёхтыӆысат, «Пулӊават» национально-культурной ханты автономия» яӆап куща пирысат. Кат таӆ сыс рупитам, тыйм верӆаӆ эӆты ясаӊ тусат.
Щи хатӆ «Наследие» нэпек шавиты хотан мохет яха актащисат. Кат таӆ председателя уӆам нэ Светлана Петровна Тайшина оӆӊа потар тус: «Муӊ автономия хоща ӆоӊам хоятат пиӆан яма рупитсув. Ханты мир уӆапса, щират-пищат, ясаӊ шавиты па еӆӆы туты ураӊан ар версув. Емаӊ хатӆат постасув, каш харат ӆарпитысув, ханты хоятӆув ханшам нэпекӆаӆ презентацияята ӆэщатсув.
СВО хоща лялясты ёх хоттэӆ хоятата нётты вер мет такан тайсэв. Хоя ох шукан нётты мосас, хоя па аӆ ям ясаӊ ястаты. Ляль хара мосты пормасат акатсув. Ляль эӆты ёхи ёхтыӆыты хоятат пиӆан тохӆаӊхоп ёхаттыйн уйтантысув, ун пумащипа ясаӊ ястыӆысув.
Там таӆан муӊ Овс мув шимӆаӊ мир ёх верат туты департамент пиӆан, яха нётасман верӆув туты ураӊан, соглашение нэпек ханшсув. Щиты, ванты, кущайт онтасан шоши хоятӆува кеншак нётты питаӆ.
Манэман, автономия правление хоща уӆам ёх, рупатаеӆ шеӊк яма версэӆ. Щи ураӊан ӆувиӆаӆа ун пумащипа!»
Щаӆта Евгений Ильич Ямру па Геннадий Павлович Кельчин Пулӊават уна ювам хоятат эӆты каматса ясаӊ ястасӊан. Ванты, щи хоятӊан автономия тыйӆтыты ураӊан, ун онтас версаӊан. Евгений Ильич мет оӆаӊ кущая ус, Геннадий Павлович еша юхатшак председателя рупитас.
Ёхтыӆыйм хантэт еша нумассат, потрэмисат. Щаӆта автономия кущая Валентин Валерьевич Вальгамов пирысэӆ. Щи каркам ху ханты культура верат шавиты, еӆӆы туты ар вераӆ. Моӆты вер туӊа-щира ӆэщатты ураӊан хоятат яха пиӆтащты вохты, ун емаӊ хатӆата хоятат яха акатты верытаӆ. Еӆӆы нопса понам верӆаӆ эӆты тамиты ястас: «Ма Пулӊаватан уӆты хоятат емаӊ хатӆата, уна ювам мохет сэма питам хатӆата ям номасан яха актащиты, мойӆаптыты ӆаӊхаӆайм. Ляль харан уӆты мохиӆува, семьяйӆаӆа нётты. Каркам па апраӊ энамты ёха грантовой касапсаята пиӆтащиты хущты па нэпекӆаӆ туӊа-щира ӆэщатты.
Няврэмӆув ин ханты ясаӊан ант потарӆат, щи вер эӆты ма ищи самем хошийӆ. Нумасӆам, ӆапат сыс куш йи пуш мосаӆ энамты ёх яха актыӆытыя па ханты ясаӊан ӆув пиӆӆаӆан потарты. Ванты, Пулӊават хантыӆув кутан няврэм утаӆтаты ар нопсаӊ хоят, хой ар потар, нэпек тайӆ, уятӆаӆӆы хоты мосаӆ ясӊат потарты. Щимащ хоят ханты уӆапса, емпас верат ищи яма уятаӆ».
Валентина Рохтымова ханшам потар
