Лух Авт
Ханты эви мастер спорта России нэман маса
Хасям ӆапатан Тазовский вошан ЯНАО Кубок северной многоборье сирн касты хоятат яха уйтантысат. Тазовской, Пуровской, Ямальской, Приуральской районат, Пулӊавт па Надым вошӊан эӆты нийӆъяӊ пеӆа хут хоят вет дисциплина хуват касас.
Там пуш си касапсайн Волноваха вош эӆты делегация ёхтыӆыйс, вет няврэм па касты утаӆтаты хоятэӆ. Ёхтыӆыйм няврэмат Овс мувеван ГТО нормайт масат па хоты тынщаӊ сува ёваӆты мосаӆ, мастер-класс вантсат.
Касапсайн уӆам энамты ёх, тынщаӊ сува ёваӆты, юх пиӆан хухаӆты, ухаӆ шоппи наварматы, ӆайм хува ёваӆты па хуӆам пуш наварматы тумпийн, этнобиатлон хося пиӆтасьсат. Вет касапсайн оӆаӊ, кимет па хуӆмет тахая этам нэӊат па ёх хоятат нэмат ястасайт.
Овс мув няврэмӆув кашӊ порайн оӆаӊ тахаята этӆыӆат, антом туп хон мувеван па муватан шоши мир мувев нох паятӆэӆ, яӆап рекордат альӆат. Северной многоборье хося округ касты няврэмат утаӆтыты хоятат ун онтас верӆат. Ин си ашкуӆая няӆсот хоят яӊхаӆ, ветъяӊ — мастер спорта нэм тайӆат.
Там касапса пуншаман, Овкуртан энмам эви Ксения Пугурчина мастер спорта России нэман маса, мойӆапсайн юкантса. Ӆув округ сборная хося ӆоӊман уӆ. Муӊева па каматса ясаӊ верас: «Ма Пулӊавт вошан Ямальской многопрофильной колледжан утаӆтыӆам, физкультура урок туты хоята питӆам. Яӆап таӆан утаӆтыты етшаӆам. Северной многоборье сирн ашкуӆайн утаӆтымем порайн касты питсам. Александр Семёнович Конев муӊев утаӆтас. Пенсияя манмаӆ юпийн, Василий Сергеевич Лонгортов муӊ пиӆэван рупитас. Пулӊавт вошан Денис Сергеевич Лонгортов манэм касапсаята ӆэсятаӆ.
Хасям таӆан Красноярск вошан ай кер тыӆасян оӆаӊ местая этсам, хольмаӊ пеӆа ӆапат пуш тынщаӊ сува ёваӆмасам. Си ураӊан си мойӆапсайн юкантсайм. Там пуш хоӆна там манты касапсайн кимет тахая этсам.
Ун пумасипа аӊкема-асема ястаты утсиӆам. Ӆув па Вуӆы ёх емаӊ хатӆатан кашӊ порайн касӆат, мойӆапсайт шитӆат. Ма ай пора эӆты ар хорпи касапсаятан пиӆтасьсам.
Артём шуӊат па Алексей яйӊаӆам манэм тынсяӊ ёваӆты утаӆтасӊан. Артём ун яем СВО хося антома йис. Муӊ ӆувеӆ нэмоӆты порайн ант ёрэмаӆэв, муӊ самӆуван век кеша хасяӆ».
Симась касапсайт си ураӊан верӆайт, округев кашӊ район эӆты касты хоятат яха ат ёхтыӆысат, Овс мув касты верӆув, шоши мир ёх уӆапсайӆув шависэӆ па еӆӆы тусэӆ, касты тахайн яӆап рекордат этаӆтысат.
Альбина Тырлина ханшам потар
Авторы
Лух Авт
Темы