Лух Авт
Ханты мир ясӊев ӆуӊтап мохты мира туӆэв
Ӆуӊ тови. Еремей Айпин манэм паӆхощаӊ потартыт мохты потартаӆ: «Наӊен мосаӆ финно-уграт нэӊхэт рут ясаӊна актащты порайна ёхатты». Ма хуӆансам, нумасӆам: «Такаӆыйи, верӆы, мув вуӆты, мола яӊхты, пора тапалман?» Юхат вер тамиты этас.
...Таӆ сусна, Ёмвосна рут ясаӊна хансты финно-уграт яха актащсат. Округев эват щита мета моса нэӊхэт усат, щи кутна вет ханты.
Хансапсэм щи эват. Оӆаӊ хатаӆна Обско-угорской институт прикладных исследований па разработок хоща, ниӆ ханты ныӊ: Юлия Накова, Евдокия Серасхова, Зинаида Лонгортова, Валентина Лонгортова хансты верӆув эват ясаӊ тусув.
Хуӆантты па муӊев вантты энамты охалят па хантэт актащсат, па щи томпи рут ясаӊна хансты отат. Энамты ханты учёной нэӊхэт Виктория Сязи па Ирина Молданова потар оӆаӊ тайсаӆан, нётсаӊан.
Ма яра потрэм тусэм, хоты хунты па хой эват хансӆам. Хансапсэм нэмаӆ рущ ясаӊна «В потоке Вечности». Мет оӆаӊна 2023-мет таӆна, ӆуӊн, Кевна касӆыты хантэт эӆты алиӆысэм, па щита мойӆасэм Вэненго рут эӆты. Ёхтам мур камн вер инщасӆат, ӆырамӆат. Потар кутна ӆуӊтарӆам ӆуӊатсаӆам, ащем куссы хансыӆыям арэм арысэм.
Кев сыӆ мув, Охсар курт эват ным ханты ныӊ Евдокия Серасхова ӆув яра ӆуӊтарӆаӆ ӆуӊатсаӆы, арӆаӆ арысӆы. Зинаида Лонгортова хантэт пиӆна яха ӆэщатам воӆаӊ хансапсы альсаӆы, этаӆсаӆы. Щитаӆна вуӆ касапсы хоща нох питас. Щаня ныӊ Валентина Лонгортова яха актащам мур ищаӆт камн арат ӆув яра хансам ясаӊӆаӆ ӆуӊтас. Хансам верӆ самна ӆаӊас па номасна хояс. Геннадий Кельчин толмащты, хансты вераӆ ураӊна мур ищаӆт воӆаӊ щирна искантап нэпекна мойӆаптаса.
Потар хот кимет хатаӆна ар мув йир эват ёхтам мур яха актащсат вуӆ кущаят ищаӆт ясаӊ таяс муӊ ханты мувев энамты учёной Виктория Сязи. Хантэт па охалят хансты нэӊхэт эват. Сэӊк воӆаӊ, асаӊ потар.
Парта Москва мохты тохӆаӊ хопна йисув: Евдокия Серасхова, Зинаида Лонгортова па ма. Ханты ясаӊ мувна щащс, ханты ясаӊ турамна, тохӆаӊ хопна щащӆ. Номсэмна сэӊк ӆытӆам: няврэмӆувна ясӊев ищиты потарман, нумасман, хансман, мосман, ӆуӊатман, арыман, веранман еӆащ ат тайӆа.
Ёхтыӆыям мур кутна тарӆыйи ныса, ханты ясаӊна потарты па хансты вер ӆыӆаӊ.
Юлия Накова ханшам потар
Авторы
Лух Авт
Темы