Лух Авт
Ханты мир ураӊан актам воӆаӊ нэпек
Там таӆ питщам вуш эӆты кашӊ хоят верытас «Араӊ, монщаӊ, потраӊ ёх» ӆуӊтап ёшан катаӆты, ӆуӊатты. Аратаӆ ханты мир ханшам потрат, арат, йис потрат, монщат хоӆ ияха Зинаида Викторовна Лонгортова акатсаӆӆы.
Мет оӆаӊан там воӆаӊ нэпек Ӆорвош районан уӆты хоятӆув ёша пайтсаӆӆаӆ. Ай кер тыӆащан АНО «Ямал-Медиа» онтасан ӆуӊтап Питӆоран, Ӆорвошан, Ващъёханован, Мужийн, Асован, Горка вошан, Ӆоркуртан этаӆтаса. Кашӊ куртан нэпек ӆуӊатты хота хоятат ёхтыӆысат, Зинаида Викторовна пиӆан потрэмисат па ӆуӊтап ёша мощатысат.
Хоты сахат там ӆуӊтап верты номасан ёхатса па вераӆ патэӆ унты тусӆы, щит эӆты Зинаида Лонгортова ясаӊ тус: «Ма хуван нумассам, ханты мир потрат, монщат, арат хоӆ йи нэпека акаттыя. Журналист, редактор па режиссёр верэм тувман, ма кашӊ пуш нумассам, мира этаӆтыты нэпек щиран муӊ ханты мирэв юкана этты нэпек шеӊк шимаӆ. Шеӊк ар нопсаӊ, араӊ хоят щикуш уӆ — туп тухаӆ хоятӆув хонна округ ӆоватан ант уйтӆайт. Хун там рупатаем питщасэм, ма хонна ант па нумассам, муй хорпи ун рупата тыйӆ.
Ёмвош округан щикуш ар ӆуӊтап этӆыйӆ, туп муӊ унтэв ар пелкаӆ ант ёхтыӆыйӆ. Куртан уӆты хоятӆув щита этты нэпекат ёша паятты ант верытӆаӆӆаӆ. Интернет щикуш уӆ, щит мохты рахаӆ там йисан нэпекат ӆуӊатты. Туп, антом кашӊ хоят щи мутра тайӆ. Щи тумпийн хун нэпек ёшан катаӆӆан, ӆыпен аматан ёхатӆа. Ӆуӊтапен нэпек лопасӆан тыеӆ-тохеӆ поныӆыӆан, туӊа-щира вантыӆыӆан.
Хун ма Ёмвоша яӊхсам, щита нэпек ханшты хоятат пиӆан уйтантысам. Кат пуша ханшты хоятӆам аршака йисат, ванты щи арат таӆ эӆты яӆап хоятат ханшты питсат, арат арыты питсат. Рутӆаӆ-сырӆаӆ эӆты хуӆӆыйм потарӆаӆ нэпека ханшты питсат.
Ун пумащипа вутщиӆам ястаты щи хоятӆама, хой кашащас манэм нётты там вуясам верэман, щит: Е.Д. Айпин, Р.М. Потпот, М.А. Рочева, Р.Г. Решетникова, О.Н. Пандо, Т.Г. Кутюмина, Л.Г. Логинова, Л.Т. Гурьева, Е.Т. Федотова, Н.Н. Истомина, С.В. Сметанина, щи тумппийн ОЦНК па И.С. Шемановской хоща рупитты хоятӆама. Щаӆта па атэӆ пумащипа, хой потрат там «Араӊ, монщаӊ, потраӊ ёх» ӆуӊтапа ӆоӊксат».
Зинаида Викторовна Ӆорвош па Кев сыӆ район тумпийн хонна Екатеринбург, Ёмвош, Хон Петра, Нижний Тагил па Тарко-Сале вошата яӊхас. Щита уӆты хоятат пиӆан уйтантыйс, яӆпа этам ӆуӊтапаӆ мойӆыӆыйс. Щи веран аратаӆ хоятан ханты мир антология ёшан катӆыӆыса, ӆуӊтыӆыса.
Ханты ясаӊ ант моштаты хоятат ураӊан потрат рущ ясӊа толмащман уӆӆат. Щи веран ӆув аршак ханты мир, ошаӊ-нопсаӊ хоятат эӆты уйтты питсат, ханты мир ӆыпи щащн ӆоӊксайт. Мохты щи ӆув па сэман хантэт пеӆа вантты питсат. Зинаида Викторовна онтасан нох аӆмиман тайӆаюв, тёпиӆаюв. Щит шеӊк тынаӊ. Щишан, па мир кутан ант ушӆув, муӊ хорасэван, ямеван еӆӆы уӆӆув.
Аллина Тоярова ханшам потар
Авторы
Лух Авт
Темы