Лух Авт
Ханты мира хайм ӆуӊтарӆаӆ, потарӆаӆ
Тампус Роман Прокопьевич Ругин сэмна питам хатӆаӆ эваӆт 87-мет таӆӆуӊаӆ лолан постас. Ӆув яӆап таӆ тыӆащ ниӆъёӊ пеӆа алаӊмет хатӆна 1939-мет таӆна Питӆор куртна сэмна питас. Амэӆ па ащеӆ олман хуват хуӆ веӆпасӆаман осӊан. Ӆапатмет класс етсамаӆ юпина, Пулӊавт васна педагогической училищая онттыда манас.
Щи юпина Роман Прокопьевич А.И. Герцен нэмпи Ленинградской государственной педагогической институт етсас. Вуӆ тахайна онттымаӆ юпина, камантсы таӆ Ӆорвош район Восяхово курт ашкоӆая мет алаӊна коща ӆаӊкар ху ос, щиӆта кощая аматса.
Ветъёӊкем таӆ «Ямальский меридиан» журналан главной редактор ропата верас. Роман Ругин олмаӆ хуват ар ӆуӊтар па потар соп ханты па рущ ясаӊна хансыӆыйс. Тохал ропатайӆаӆ па мув мир ях ясаӊна толмащман оллат. Кат ӆуӊтарӆ мировой поэзия антология хоща лоӊсаӊан.
Малай нэӊху сэрак хансты номасна ёхатӆа, хоты щит ёхатӆ? Щи инщасапса хоща Роман Прокопьевич тамиты лавас: «Ай олмем порайна, ма сэӊк ар монщ, йис потар холсам, аса номасна понман тайсаӆӆам. Щи юпина охамна потрат этсат, ма па ӆувиӆаӆ нэпек эӆты ханссаӆам».
Ант ярэматы ораӊна, Роман Прокопьевич Ругин сэмна питам хатӆ пеӆа Пулӊаватна, ӆув нэмаӆна понам нэпек ӆуӊатты хатна уйтантопса актыӆыса. Тамхатӆ, ӆув муӊ пиӆэвна антам кепа, ӆув хансам ӆуӊтарӆаӆ номман тайӆайт, ӆуӊатӆайт.
Вера Лонгортова хансам потар
Авторы
Лух Авт
Темы