Лух Авт
Ханты рут мир ёх уӆапса утаӆтыӆат
Ашкуӆа пора етшас. Няврэмат хуӆам тыӆащ щутщаты питӆат. Ӆуң сыс кум шитман хой хоӆта манаӆ. Хой хошам щарс пеӆа, тухӆат Кева манӆат, уншак эвет-похат рупитӆат.
Няврэмат, хойтат ӆуң сыс уӆты куртӆаӆ эӆты нэмоӆты хоӆта ант манӆат, ашкуӆаятан пришкольной лагерятан ӆэщатсайт.
Ӆорвош районан ущ тыӆащ оӆаңмет хатӆ эӆты кашң куртаң щимащ лагерь овӆаӆ пуншаӆ. Ӆуң сыс няӆсот пеӆа хольмаң вет няврэм ӆапат таӆ эӆты ӆапатхощъяң таӆ унты щита щутщаты верытаӆ.
Питӆор куртаң эвет-похат па «Ӆыӆаң йиңк» экспедицияя Марий Эл Республикая манӆат. Ашкуӆа куща — Нина Александровна Горнова, няврэмат пиӆан юш ӆаваӆты нэңа манаӆ. Юша ӆэщатыты вер эӆты каматса ясаң ястас: «Куртэв эӆты вет няврэм манаӆ. Хоӆна па Волновахской район Привольное курт эӆты вет няврэм муң хощаев пиӆтащӆат. Щита уӆтэв сыс марийской мир ёх уӆапса вантӆув, и хорпи ясаңӆаӆ артаӆаӆӆув, катра пормас шавиты хотата ӆоңтыӆув па воӆаң Волга ёхан хуват тутаң хопан яңхӆув. Ёхи ёхаттэӆ юпийн, няврэмат исследовательской рупата верӆат. Сочинение па газетая потрат ханшӆат. Тамащ экспедицияята муң ашкуӆа няврэмӆув кашң таӆ яңхӆат. Ханты рут мир ёх муват лап яңхсэӆ, ар яӆап пормасат, ясңат, верат, ощхулят эӆты уйтты питсат».
Яңхты юшеӆ «Тайны Республики Марий Эл» проект хуват верса. Ар таӆ кеша ӆэщатам районной целевой программа хуват там экспедицияйт рупитӆат.
Зоя Куртямова ханшам потар
Авторы
Лух Авт
Темы