Лух Авт
Ханты уӆапсаев шавиӆэӆ па еӆӆы туӆэӆ
Там мосванан округев 95-мет таӆаӆ постас. Ямал мувев хуват кашӊ тахайн емаӊ хатӆат мантсат. Садика яӊхты ай эвиет па похат си хатӆа па ӆэсятысат: ӆуӊтарат, якат, арат утаӆтысат, хорат ханшсат, мойӊ хоятат пиӆан уйтантысат.
Пулӊават вошан «Мувхор» нэмпи садика «Мурхи сун» па «Сорни тутые» ханты арат арыты па нарасъюхан ёнтты группаята яӊхты ханты эвет па похат ай няврэмиет хося яӊхсат.
Каш верты хотан рупитты нэ Наталья Фёдоровна Ребась ханты няврэмӆув пиӆан «Хатӆ ёш» группайн емаӊ хатӆ ӆэсятсат. Ай няврэмиет ещаӆ арысат, ёнтсат. Похиет Овс мув касапсаята пиӆтасьсат, эвиет ернас ёнтты ураӊан мосты пормасат акатсат. Яха округев эӆты инсясапсайт па амаматсет ӆэрапсат, мастер-классан хорам вуӆы хот ёнттот версат.
Наталья Фёдоровна рупатаеӆ эӆты каматса ясаӊ ястас: «Хасям ӆапатан округев емаӊ хатӆаӆ постас. Хасям таӆатан номас версув, садика яӊхты няврэмата Ямал мувеван уӆты шоши мир хоятат эӆты потар туты. Арпелак ханты хоятат уӆапса, хорам сохӆув, арӆув, якӆув, муй хорпи нарасъюхат тайӆув, альӆув.
Округ емаӊ хатӆ еӆпийн хоӆ «Бережок», «Журавушка», «Оленёнок», «Кристаллик», «Светлячок» садиката па нарасъюхан ёнтты хота яӊхсув. Щита уӆты няврэмата па каш ӆэсятсув».
Тамащ уйтантопсайт шеӊк мосӆат. Си онтасан садика па ашкуӆая яӊхты няврэмат ханты хоятӆув эӆты аршак уятты питӆат, ханты уӆапсаев еӆӆы манаӆ.
Альбина Тырлина ханшам потар
Авторы
Лух Авт
Темы