Лух Авт
Ханты уӆапсайӆ самаӆан тайӆаӆӆы
Москва вошан хорам ун вантопса ус. Щита ма Никита Ребась, ханты похие пиӆан уйтантысам. Инщассэм ӆувеӆ хоӆща ёхтас, хота утаӆтыйӆ, хойн ханты як якты утаӆтаса.
«Там вантопсая муӊ Хон Петра вош эӆты ёхатсув. Щита ма А.И. Герцен нэмпи университет хоща детства институтан оӆаӊмет таӆ утаӆтыӆам. Тата утаӆтыты етшатэм юпийн, культуролог пеӆа еӆӆы утаӆтыты манты номас тайӆам.
Ун воша утаӆтыты ёхатмеман, мет оӆӊа шеӊк ёхи ӆаӊхасайм. Юхат округ эӆты ёхтам няврэмат пиӆан пиӆтащсам, щаӆта па ашкуӆайн ма пиӆэман утаӆтыйм эви Таня Пиналей ищи тата утаӆтыйӆ. Хув тахайн уӆтыйн, рут мувен эӆты ӆухас тайман, самен хоща каш па номас хоща ям. Там йисан потарты хошапат уӆӆат па аӊкем пиӆан ӆапат хуӆам-няӆ пуш нёхты хор хуват потрэмиӆам. Матты ки ёӆан усам.
Там уйтантопсая муӊ «Овс хус» якты, арыты па каш ӆэщатты группаев пиӆан ёхатсув. Зоя Степановна Рябчикова там группаев туӆ. Мет оӆӊа Виталий Куртямов манэм тый вохсаӆӆы. Тата Ёмвош па муӊ округев эӆты ханты па охаль няврэмат якты утаӆтыӆув, рут ясаӊан арыӆув, потрэмиӆув, емаӊ хатӆат порайн яха уйтантыӆув.
Ёӆан, ашкуӆайн утаӆтымеман, ма каматса пох пиӆан Олег Игоревич Потпот хоща каш верты хота яӊхсув. Ӆув муӊев нарасъюхан нарасӆыты, ханты якат якты утаӆтасӆы. «Овс хус» группая ёхатмеман, ма ёӆан утӆам верӆама похат утаӆтаты питсам, хоты сахат якты па нарасӆыты мосаӆ. Олег Игоревич утаӆтам вераӆ еӆӆы туӆэм.
Ашкуӆа етшаты няврэмата ястаты утщиӆам. Аӆ паӆаты, еӆӆы ям уӆапса пеӆа вурататы. Ёӆан хащам аӊкиӆан-ащиӆан, рутӆан, ханты уӆапса щирӆан-пищӆан аӆ ёрэмаӆан. Па мир хоятата ишакман нын ханты миран эӆты потартаты».
Зоя Куртямова ханшам потар
Авторы
Лух Авт
Темы