обновлено: 05:14, 09 августа 2023
Лух Авт
Ханты вер еӆӆы туты нэӊӊан
Унт ӆор тыӆащ 8-мет хатаӆан Канащ Пухаӆан Алла па Яна Тайшинӊан «Связь поколений» вантопса пуншса. Аӊки па эви ёнтам сохат кашӊ хоят верытаӆ унт ӆор тыӆащ 31-мет хатӆ унты вантты.
Там ёнтам сохӆан ӆын пунаӊ сох, нуй па щашкан эӆты ёнтсаӊан. Пулӊават вош, Канащ Пухаӆ па Аксарка курт хоятат тумпийн Москва вош эӆты ёхтам хоятат ищи усат.
Ӆув ураӊӆаӆан Алла Прокопьевна потартас, хоты сахат кашӊ сох ёнтӆа. Пунаӊ сох эӆты ки, ӆонан ёнтӆа. Иса потарсаӆӆы, хоты вуӆы хортыйн ӆон вуӆа, сораӆӆа, па щи юпийн нэӊат кум шиттэӆан ӆон верыӆыӆат. Вай, куващ, сах, моӆщаӊ ёнтты порайн — кашӊ вер щиран мосаӆ атэӆ ӆон, щишан сохам иты, ӆув ищи кашӊ от, ӆув куӆат тайӆ.
Хоты Алла Прокопьевна ястас: «Ханты мир кутан эвет ай тэӆан ёнтасты питыӆысат. Щишан, ма йинтап катаӆты верытты питмем вуш эӆты ёнтасты питсам. Мет оӆаӊан аканят па акань сохат ёнтсам. Унашак йиты питмеман ай ернасат, щи юпийн нуй сахат, нуй вайт, ханшет нуй эӆты, па щи юпийн ханшет кепӆат эӆты эвтыӆысам. Ун эвия ювмем юпийн — щит хоты вайт, моӆщаӊат, буркайт, кувщат па сахат. Туса ёнтасты ураӊан, мет мосты вер — щит ӆэпат сох. Щишан ӆувеӆ мосаӆ туӊа щира ушиты, ёталты, татаӆты, ёнтты. Вай ант морты ураӊан, ӆуӊ сыс яма восытты.
Щашкан пиӆан кеншак рупитты. Ернасат па порхайт эвем пиӆан иса ёнтыӆыӆман. Ин Наина хиӆэм унашак йис па ищи ёнтасаӆ. Ханшет эватӆыйӆ. Ӆувеӆа щи вер умащ, ищимет «пазл» хорат акатаӆ».
Ун пумащипа вутщиӆам ястатыя там ханам нэӊӆама, верты веран еӆӆы ищиты ат туӆӆан! Щи паӆата йисӊан, хун рахаӆ ханты мир сох ӆапка пуншты, шеӊк ханты мир сохан шушиӆыты ӆаӊхаты мохета тыныты.
Ойӊа-пищаӊа, йисаӊа-нуптаӊа, тумтак ёш па тумтак кур!
Аллина Тоярова ханшам потар
