Лух Авт
Хащам таӆэв сохныӆыйс, яӆап верат тувиӆыйс
Кашң таӆ хащам ятан муң потар поныӆыӆув, хоты хащам таӆэв усэв. Там пуш арсыр верат тыйиӆысат, щитат эӆты иса ханшиӆысув.
Таӆ питщам вуш эӆты муң, АНО «Ямал-Медиа» хоща рупитты хоятат, «ЧУМовая подписка» верыӆысув. Щи тумпийн хоятат пиӆан кашң пуш уйтантысув, потар актыӆысув, газетая поныӆысув. Там пуш потар каншман па ханшман няӆ хоятэв рупитас: Аллина Яковлева, Зоя Куртямова, Вера Лонгортова па Альбина Тырлина. Мет ар потар ноптаӆты хоятат эӆты Альбина Егоровна тутӆыйс. Щи тумпийн ӆув Ӆоркурт, Горка вош, Ӆорвош хоятат хоща яңхас па кашң ханты хоятэв «Ӆух Авт» газетая ханшӆтас. Ӆув щём па юр понмаӆ онтасан ин кашң семья ханты ясаңан ӆуңатты питаӆ.
Хащам ятан «Ма ясңем юраң па тащаң» нэмпи конкурс верыӆысув. Щий, па таӆат пиӆан артаӆаман, шеңк ар хоят пиӆтащийс. Ветъяң пеӆа няӆ хоят рупатайӆ китыӆысӆы. Китам рупатайт хоӆ «Ӆух Авт» газетайн па социальной сетят хоща вантты рахӆат. Нох питам хоятӆув мойӆаптасӆув, хащам мохиӆув хоӆ мойӆапса нэпекан китсаӆӆув. Щи веран, хой там конкурса пиӆтащийс, кашң хоята вутщиӆам пумащипа ясаң китты. Ищиты ханты ясңан, ханты мир уӆапсайн еӆӆы туваӆан, аӆ ёрэмаӆан.
Няӆ хоятан ищипа кум ант тайӆув кашң воша яңхапты, айкеӆ ханшапты. Щишан, там пуш, муңев ӆапат хоят там веран нётас. Щит: Людмила Гурьева, Владимир Енов, Ольга Пандо, Ирина Косачёва, Галина Кечимова, Валентина Лонгортова, Антонина Сязи (Серасхова). Папуша яртъяң хоят постасув. Нумастэман, па аршак па умащ ханты ясңаң потар ӆуңатты верытӆаты.
Ханты ясңев шавиты па еӆӆы туты ураңан, муңева, аратаӆ ханты мира, мосаӆ ияха понасман там верэв нох аӆамман тайты. Щишан, муңева айкеӆ верыӆыяты, муй хорпи верат нын куртанан, вошанан тыйиӆыӆат — щит эӆты муң, нын китам айкеӆӆан эӆты потар верӆув. Щи порайн аратаӆ миран ӆуңатӆа, уятӆа.
Ма па, там Яӆпа питты таӆ кеша мойӆапса ясаң китӆам. Тумтак ёш, тумтак кур! Ойңа-пищаңа, йисаңа-нуптаңа!
Аллина Тоярова ханшам потар
Авторы
Лух Авт
Темы