Лух Авт
Хатнэху па ӆув самаӊа тайты вераӆ
Кашӊ хатнэху там нови туром иӆпийн самаӊ вер тайӆ. Щиты ма самаӊа ӆув вераӆ ӆэщатты хоят Николай Фёдорович Рочев пиӆн уйтантысам па иньщассэм, муй щирн ӆый «Северной панорама» нэмпи Ӆорвош район газетайн уӆӆат па тамхатӆ вуш унты рупитӆат.
– Николай Фёдорович, мата таӆ вуш эӆты нын Ӆорвош районан «Северной панорама» нэмпи айкеӆаӊ нэпек эсаӆтыя питсаты?
– Муӊ Ӆорвош районэв айкеӆат ханшты нэпекев лыпат хойты тыӆащ 8-мет хатаӆн 1940-мет таӆн эттыя питас. Щи йисн ӆув ханты щирн «Сталин юш хуват», щаӆта «Ленинский путь» нэм па тайс. Щиты район газетаев этас, хота айкеӆат рущ ясаӊан ханшсайт.
– Муй арат хоят ин нын газетайн хоща уӆ па муй хорасоп верат кашӊ атэӆт щирн уӆты хатнэху ӆэщатӆ?
– Муӊ редакция хотэвн 18 хоят рупитӆ. Ӆый кутэӆн айкеӆат акатты хут хатнэху тайӆув. Ӆый тумпеӆн, хорат вуты нэ, айкеӆ туса вантты па артаӆаты редактор нэ, район газетаев куща ӆаӊкар, хуӆам хатнэху туп Муши вошн айкеӆат акатӆат, и собственной корреспондент ху Горки вошн па и нэ Овкуртан айкеӆат каншман муӊ газетаев ураӊан рупитӆаӊан. Щиканща печатной цех тайӆув, хота и хатнэху муӊ айкеӆаӊ нэпекев эсаӆман рупитӆ.
Газетаев хоща этты специальной выпускат па компьютерной вёрсткаев хоща тамхатӆ па кат хоят рупитӆаӊан. Щаӆта ма кущая уӆӆам па ищиты ям арат айкеӆ ханшӆам.
– Николай Фёдорович, муй арат пуш тыӆащ сыс нын газетайн этаӆ?
– 24-кем лопасан кашаӊ ӆапат хутмет хатаӆн А4 формат щирн газетаев этаӆ. Ӆуӊ порайн, хун арпелак хоятат щутщатыя манӆат, щи тыӆщатн 16 лопас эсаӆӆув. Муӊ районэвн, ванта, сыр-сыр ай куртатн па вошатн хоятат уӆӆат па рупитӆат. Щи уӆты тахайӆаӆ ӆый кутэӆн хув тахаятн омасӆат. Щи ураӊан шеӊк ӆаварт ӆый хощаеӆа яӊхты па айкеӆат акатты. Муӊ ищипа верытты кемн хуӆ па вой веӆпасӆаты ёхӆув ай куртата Ай Ас муй Ун Асэв хуватн яӊхӆув, уйтантыӆув, газетаева мосты айкеӆат каншӆув. Тухаӆ порайн Районной Думаев поступсэт муй Вестник избирательной комиссии потрат онтасн муӊ газетаев шеӊк куӆа йиӆ па щиты щи этаӆ. «Северной панорама» айкеӆаӊ нэпекева районэв ӆоватн уӆты хоятат ханшанщӆат па почта хуват газетаев ёша пайтӆат. Щаӆта па хащам газетайт арсыр ӆапкаята китӆув, хота хоятатн ӆутӆайт. Ияха ки ӆуӊатты, щит 900 экземпляр. Ма щирэмн, щи арат газета тармаӆ, ванта, районэван 10-кем щёрас хатнэху тамхатӆ уӆ.
– Муйсыр верат эӆты нын газетайн хоща арсыр айкеӆат ханшӆаты?
– Муӊ политика тумпийн, ар хуӆ веӆпасӆаты, вуӆэт ӆаваӆты па мув харн энмаӆты ӆэтотат пиӆан рупитты хоятат па ӆый рупатаеӆ эӆты ханшӆув. Щаӆта шоши мир уйтантопсайт муй вантопсайт манты вер эӆты. Газетаев хоща па тыӆащ соханты порайн ханты ясаӊан ханшам «Ӆыӆаӊ йиӊк» лопас тайӆув. Имохты па ӆув юпеӆн саран мирэв ясаӊан этты «Войвы му» лопас хоща ищиты сыр-сыр айкеӆат ӆэщатӆув. Щитэвн марэматыя кум иса муӊ ант па хоӆамӆув.
– Николай Фёдорович, муйсыр верат мет яма па умща наӊ айкеӆат ханшты рупатаен хоща кашӊ пуш тайӆан?
– Ма щирэмн, тата манэма па ма пуӊӆэман уӆты хоятата мосты рупата иса верӆам. Уӆапсаем хуватн арсыр хоятат пиӆн уйтантысам па потрэмасам, ӆый эӆтаеӆ айкеӆат ӆэщатсам. Катра порайн вуӆы тащатн яӊхсам, вантсам, муй щирн веӆпасӆаты ёхӆув ун сух хуӆат ёша пайтсат. Ар пуш Варчато сыстам ӆорн усам. Ин ищи порайн Ӆорвош район хуватн яӊхӆам па сыр-сыр айкеӆат хоятат па ӆый уӆапсаеӆ эӆты туӊа щира ханшӆам. Ям па хоятата мосты рупата муӊ тата верӆув.
Ёхи хащам порайн щиты ястатыя рахаӆ, хоты Николай Фёдорович ар таӆ сыс Ӆорвош районэв «Северной панорама» кущая уӆ, вещката па самаӊа хоятат пиӆн рупиттаӆ ураӊан арсыр нэматн куща ёхатн юкантса. Щит «Ветеран труда», «Ямало-Ненецкой округ культура заслуженной рупатнек» па «Ӆорвош район Почётной хатнэху».
Владимир Енов ханшам потар
Авторы
Лух Авт
Темы