Лух Авт
Хой самаӆ наука пеӆа хойӆ
Шоши мир энамты нэӊхэт хой аспирантура етсата питас па учёной степень тайта ӆытӆ губернатор грант ясна пайтта веритӆат. Ай кер тыӆащ 28-мет хатӆ маса заявка китта рахал. Ловатӆна холам грант, ӆатӆ сертификат тынӆ сат щёрс.
Грант сытты ораӊна касты хар манта маста питӆ. Ӆув научной ропата верты шимӆаӊ мир нэӊхэт па студентат кутна наука алӊищ туты ораӊна верса. Ясна пайтты охат экспедиция верты таха, научной уйтантопса, конференция па па мета маса таха пеӆа китта рахал.
«Муӊ ӆытӆу, шимӆаӊ мир энамты нэӊхэт ораӊна, хой самаӆ наука пеӆа хойӆ, номасӆаӆ туӊа-щира верта нятта. Верты ропатайӆаӆ прикладной характер па Овс мув специфика тайта масӆат», — шимӆаӊ мир департамент коща ныӊ Ульяна Каленюк лавас.
Щи касты хара питты ораӊна аспирантат па учёной степень мощатта ӆытты энамты нэӊхэт ораӊна масӆ нэпекӆаӆ акатта па шимӆаӊ мир департамента китта. Департамент сайт хоща вантта рахал мала хорпи нэпекат акатта масӆ па там телефон хуват инщиста: 8 (34922) 6-70-23.
Шимӆаӊ мир энамты нэӊхэт ораӊна сат щёрс соӆкува грант 2021-мет таӆ эваӆт мата питса. Щи таӆат сыс ертъяӊ нэӊху грант ясна пайтас. Туняӆ нох питам нэӊхэт кутна Антон Русмиленко, Любовь Возелова па Светлана Тусида. Грант охлаӆ верты ропатайӆаӆ пеӆа китсаӆӆаӆ.
Авторы
Лух Авт
Темы