Лух Авт
Хоят уӆапса кен верты программа
Ямал па Югра муван уӆты хоятат пенсияя мантэӆан, хошам муват пеӆа уӆты касаӆӆат. Шеңк хува ант мантыйн, Тюмень вошан па ванан уӆты куртатан уӆты рахаӆ. Щи кеша «Сотрудничество» программа ӆэщатман уӆ.
Там программа 2004-мет таӆ эӆты рупитты питас. Там пуш хус таӆа йис, хоты хуӆам регион яха пиӆтащман рупитӆат. Щи пора эӆты ӆапат щёрас хоттэӆ хоят хошам муват пеӆа касаӆсат. Тюмень вошан Ямальской-1 па Ямальской-2 микрорайонңан ӆэщатсайңан, яӆап хольмаң пеӆа няӆ хот омасса. Ӆапкайт, щутщаты, ёнтты па касты харат ванан уӆӆат, ашкуӆайт па ай няврэмат шавиты хотат пуншсайт.
Пиращ хоятат, Овс муван маты пенсия охаӆ па тыӆащ сохаптаты хот охаӆ нётман тайӆа. Рупитты ёх леккар хотата яңхты верытӆат. Энамты няврэмат щутщаӆат. «Сотрудничество» хуват округ хоятӆув щита уӆты санаторияята яммаӆтыты яңхӆат.
Тюмень вошан хот шитты ураңан ин ант мосаӆ хот верат туты департамента манты, Госуслуги па МФЦ хуват нэпекат маты рахаӆ. Щиеӆ пеӆа уӆты манты еӆпийн, мосаӆ Овс муван иса уӆты па ветхощъяң таӆ тата рупитты.
«Сотрудничество» программа ӆыпи рупатайӆ щиты верман уӆ, нётапса мосты порайн, хоӆта мосаӆ, щиеӆ пеӆа кератты ат рахас. Хуӆам регионан уӆты хоятат, уӆапсаеӆ яма па кенашак верты ураңан там программа ӆэщатман уӆ», — Тюменской область куща ху Александр Моор ястас.
Зоя куртямова ханшам потар
Авторы
Лух Авт
Темы