Лух Авт
Хоятат яммаӆман рупитаӆ
Хон мувев ӆоватан ар хоят леккар хотан рупитаӆ. Леккарат тумпийн тохи хоӆна ар щира рупитты хоятат ӆуӊтасман уӆӆат. Кашӊ таӆ ущ тыӆащ хуӆмет ӆапат ох хатаӆан ӆув кешаеӆ емаӊ хатӆ постаӆа. Тампуш щи емаӊ хатӆ ущ тыӆащ 21-мет хатӆа хойӆ. Щи кеша ханты леккарэв эӆты потар шуп понӆув.
Александр Леонтьевич Нензелов Ӆорвош район ӆоватан кашӊ куртан яма уйтӆа. Ӆув леккара па районной Дума депутата уӆ. Туняӆ Ас потты тыӆащ соханты хатӆатан юбилейной сэма питам хатӆаӆ постас — хутъяӊ пеӆа вет таӆ ӆовата йис.
Ӆув Ас потты тыӆащ 28-мет хатаӆн 1970-мет таӆан сэма питас. Ащеӆ, Леонтий Иванович — Ёханкуртаӊ ху. Антеӆ, Дарья Алексеевна (эви опращ нэмаӆ Пырысева) — Ямкурт нэ. Уӆтаӆ хуват хуӆ веӆпасман рупитсаӊан па ар няврэм вещката энмаӆсаӊан: няӆ эви па йи пох — Александр.
– Ма нийӆмет класс Васьёханов ашкуӆайн утаӆтыты етшаптасам. Щаӆта, щи юпийн Мужи вошн хоӆна кат таӆ утаӆтысам, яӊмет класс етшасам па мохты соӆтана армияя вусайм. Кат таӆ Узбекистан муван Туркестанской военной округ хоща соӆтана яӊхсам, — Александр Леонтьевич потартас. — 1990-мет таӆн соӆтан эӆты ёхи ёхатсам па мохты рупатая ӆоӊксам. Рупата щира нумасты ант мосас, ванты, ма ащем уӆтаӆ хуват хуӆ веӆпасӆаман рупитас, ван кутан планӆаӆ тэкнаптысӆы. Айтэӆн ащема нётсам, хуӆ веӆты утаӆсам, щишан ащем пиӆан хуӆ веӆты питсам.
Щиты ӆув ӆапат таӆ хуӆ веӆпасӆаман «Горковской» рыбозавод хоща рупитас. Щаӆта щи юпина, Александра ийимеӆ пиӆан номас понтсаӊан еӆӆы утаӆтыты манты. Катӊан 1997-мет таӆ эӆты па 2000-мет таӆ унты Пулӊаватан медицинской училище хоща утаӆтысӊан. Па мохты, еӆӆы утаӆтыты Тюмень воша медицинской академия хоща мантсатан. Щита хоӆна аршак утаӆтыты мосас. Хут таӆ хащман, 2006-мет таӆн ӆын утаӆтыты етшасӊан па леккар дипломӊан ёша паватсаӊан.
– Утаӆтыйм тумпина, ма Тюмень вошан хоӆна рупитсам. Вошаӊ леккар хотатан няӆ таӆ леккар нётты хоят щира усам, — Александр ястас. — Семьяема нётты мосас. Дмитрий ун похиев щи порайн ай, антимеӆан шависа па энмаӆса.
Щаӆта, 2007-мет таӆн кат яӆап ун леккар-терапевтӊан Мужи воша рупитты ёхатсаӊан. Щи таӆн кутап похиеӆ сэма питас. Аратаӆ, ӆув ийимеӆ пиӆан няӆ няврэм тайӆаӊан. Ун похаӆ Дмитрий, ашкуӆа юпийн Ёмвошн утаӆтыйс. Щита уӆты па рупитты хащас. Айшак отӆаӆ ёӆан уӆӆат, ашкуӆайн утаӆтыӆат. Кум шитман, щутщаты пораятан, ӆув семьяйӆ пиӆан унта яӊхаӆ. Няврэмӆаӆ па ийимеӆ рых вонщты тутлиӆӆы. Ӆэты арат хуӆ веӆаӆ па вой веӆты яӊхаӆ. Кат айшак похиеӆаӆ — Кирилл па Макар, энмам Ёханкуртаӆа патан вуйӆыӆӆы. Ёӆан, па щикут, Эвелина ай эвиеӆ антиеӆ пиӆан ӆавӆасӆаӊан.
Александр Леонтьевич рупитты питмаӆан па еӆӆы утаӆтыты номас понас. Интернатура щиран еӆӆы юшаӆ тусӆы. Оӆаӊ таӆатан, 2007-мет таӆ эӆты па 2009-мет таӆ унты Александр Леонтьевич разъездной терапевт леккара рупитас, ай куртыета па вошата яӊхас. Кашӊ куртан шоши хоятатан ӆаваӆса.
– Леккара рупитман мосаӆ ивеван утаӆтыты. Йи лотан аӆ щиты омасты ант мосаӆ, кашӊ таӆ яӆап мутрайт па щират этӆат. Щишна ма хоӆна кимет леккар щира утаӆтысам, — рупатайӆ эӆты Александр Нензелов ястас. — Оӆӊа эндокринолога па щи юпийн, 2011-мет таӆн фтизиатр леккар вер тайты питсам. Ин па там порайн хатӆ сыс стационар хоща терапевта рупитӆам, па щи кут поликлиника хоща эндокринолог приём па верӆам. Шоши хоятӆам яма уйтӆаӆам. Куртаӊ ёх, хой веӆпасӆаты, вуӆы тащ шавиты ёх иса ёхтыӆыӆат. Приём мантаӆан ӆув верӆаӆ эӆты потарӆат па муй номас тайӆат, щит ищи манэм потарӆат.
Александр Леонтьевич Нензелов хоятатан яма уйтӆа. Хоят пеӆа ӆув ям, самаӊ, иса муйн нётты верытаӆ. Еӆӆы шоши хоятӆаӆ па шоши муваӆ пеӆа нумасман уӆ. Щиты, 2020-мет таӆн номас понас, депутатат пирыты хара ӆувеӆ ханшӆтаты. Ӆорвош районэв хуват ӆув хоятатан яма уйтӆа, щишан районной Дума депутата мохты пирыса. Вет таӆ хащас па Ӆорвош районэв Дума хоща ӆув кимет пуш пирыса.
– Муя ма депутат вер туӆэм, ванты, ма тата сэма питсам, энампсам, уӆӆам па рупитӆам, щишан шоши мир нуша верат уйтӆаӆам. Ма иса муй верӆам, хоятӆама нётты онтас туӆам, — ханты леккарэв потартаӆ. — Куртаӊ ёх уӆапса ямашак ӆэщатты мосаӆ, аршак яӆап хот омасты, щи порайн утаӆтыйм айӆат ёх ёхӆы йиӆат. Леккар хота рупитты ёхатты энамты няврэмата ищи иса нётӆам. Депутат иты ма онтас верӆам, ӆуӆн Ӆорвош районэван мирэв верат ӆэщатман ат уӆӆат, ай куртаӊ ФАПат мосты порайн портунат па па отат ат тайсат.
Ӆув рупатайӆ яма уйтӆаӆӆы па самаӊа тайӆаӆӆы. Рупатайн ищи самаӊа тайӆа па ӆув эӆтэӆ иса ям ясаӊан потарӆа. 2020-мет таӆ эӆты па 2022-мет таӆ унты Ӆорвош район поликлиника хоща кущая понман ус. Щаӆта щи таӆатан коронавирусной нэмпи атом муш мир ӆоватан ус. Щи порайн Новый Уренгой воша шеӊк ӆаварт мушаӊ хоятат артан тохи китыӆысайт. Рупитты ёш ант тармас. Щишан округ ӆоватэв эӆты леккарат тохи вохиӆысайт. Ӆув щита каматса тыӆащ «красной зона» хоща хоятат яммаӆман рупитас.
Яма рупитты ураӊна, Александр Леонтьевич ишканщап нэпекат тайӆ: Благодарность Главного врача Мужевской ЦРБ, Благодарность Районной Думы МО Шурышкарский район па Благодарность Председателя Тюменской областной Думы.
Еӆӆы тумтака па вещката ӆувеӆ уӆты па шоши хоятата, шоши муваӆа онтас верты. Ям верат верты па яма рупитты ураӊна ат уншак тынаӊ ишканщап нэпекатан, мойӆапсаятан юкантӆа!
Иван Сандрин ханшам потар
Авторы
Лух Авт
Темы