Лух Авт
Хоятата самаӊа нётты рупата
Ущ тыӆаш 8-мет хатаӆан Хон мувев ӆоватан Хоятата нётты щира рупитты хоятат емаӊ хатӆ постасат. Рущ ясаӊна щи хоятат социальной работниката айӆӆайт. Щимащ тахайн хоят пеӆа туп шеӊк-шеӊк самаӊ хоятат рупитӆат. Там лопасан щимащ хоят эӆты ӆуӊтаӆан. Щит Анна Романовна Туляхова.
Там емаӊ хатӆэв тампуш 26-мет пуш постаӆа. Щи кеша ай тахайт потты тыӆащ 27-мет хатаӆн 2000-мет таӆан Хон мувев куща ху Владмимир Путин партапса ханшас. Пирщамам, мушаӊ па лавартаӊ хоятат ивеван эӆты вантман тайты мосӆат. Хой няврэмат па ван рутат ант тайӆат, щит хоща нэман рупитты хоят ӆэщатӆа.
Щимащ рупатайн хольмаӊ пеӆа вет моӆтас таӆ Анна Романовна рупитаӆ. Ӆув хоят пеӆа шеӊк самаӊ па ӆэпат хоят, муйн верытаӆ, иса нётаӆ.
Анна Романовна вуӆэӊ хоттэӆ ёх хоятат хоща щёхар тыӆащ 26-мет хатаӆн 1970-мет таӆн Ӆорвошан сэма питас. Ащеӆ Роман Иванович па антеӆ Ульяна Семёновна Возеловӊан. Антеӆ Овкурт эӆты, эви опращ нэмӆ — Лонгортова. Ӆын няврэмӆаӆ вещката энмаӆсаӆӆаӆ, иса ям хоята йисат.
– Ма ӆапат таӆ ӆоватан Ӆорвош ашкуӆая тусайм па щита яӊ таӆ утаӆтысам. Ашкуӆа юпийн ма ай леккара рупитты ӆаӊхасайм па щи кеша медицинской училище хоща утаӆтыты питыӆысам. Еша утаӆтысам па щи вер манэм ант рахты питас, — Анна Туляхова нумаӆмиман ястас. — Щи порайн Ӆорвошан ӆапка нэӊат моссат. Щишан ма Пулӊаватан кооперативной профтехучилище хоща ӆапка нэӊа утаӆтыты мантсам па ущ тыӆащ 20-мет хатаӆ 1991-мет таӆан ӆувеӆ етшаптасэм. Па мохты, уйтӆор тыӆащ оӆаӊ хатӆ эӆты Мужи вош рыбкооп хоща рупатая этсам.
Щиты утаӆтыйм щиран, Анна Романовна хут таӆ самаӊа рупитас. Щи юпийн нянь верман рупитас па кладовщик щира база хоща уӆӆыйс. Пора хащаман ӆув па еӆӆы утаӆтыты номас понас — ищипа хоятата нётап туты вуратас. Заочной щиран Пулӊаватан уӆты Овс мув шимӆаӊ мир А.М. Зверев нэмпи педагогической колледж хоща няврэмат хатӆ сыс шавиты нэӊа утаӆтыты питас. Щикут рупатая вохӆа.
– Социальной работника рупитты вохсайм. Ван хатӆап тыӆащ оӆаӊмет хатаӆн 2000-мет таӆан рупатая этсам па инты унты щи рупитӆам. Щикуш заочной щиран няврэмат хатӆ сыс шавиты нэӊа 2003-мет таӆн утаӆтыты етшаптасам, вурты диплом ёша паватсам, ищипа уншак хоятӆам пиӆан рупитты хащсам, — Анна потартаӆ. — Утаӆсам ванан уӆты хоятӆама нётты. Ма рупатаем щиран мосаӆ утща хащам, пирщамам па ӆаварта ювам хоятата нётты: хотӆаӆ сыстамтаты, ӆэтот ӆутты па каварты, сохӆаӆ пусты, портунат ӆутты па муй ӆувиӆаӆ мосаӆ, щит верты.
Хув па самаӊа рупитты ураӊна, Анна Романовна ар пуш ишканщап нэпекатан рупата эӆты юкантыса, мойӆапсаятан Лорвош район куща эӆты мойӆыӆыса. Каматса таӆ хащаман емаӊ хатӆэӆ кеша ӆув Благодарность нэпекна Ямал социальной защита департамент эӆты мойӆаптыса.
Анна Романовна, ийикеӆ Виталий Петрович Туляхов пиӆан ӆэпат самаӊ хоятӊан, ешауӆ хольмаӊ таӆа йиӆ, хоты ияха уӆӆаӊан. Йи эвие энмаӆсаӊан. Ин па ӆувеӆ кат хиӆэӊаӆаӆ энмаӆты нётӆаӊан. Хун эвиеӆ уна йис па утаӆтыты манас, утща аӆ уӆты ант верытсат.
– Муӊ нумасты питсаман шукащты няврэм вуты па энмаӆты. Щиты ма нэпекӆам акатсам па Киров воша яӊхсам. Щи вошан антиӆы-ащиӆы хащам няврэмат уӆты хот уӆ. Ай похие кащаӆасам па щикем щаль питас, — Анна Туляхова ястас. — Ӆув нэмӆ Андрей Грачёв, щи порайн хуӆам таӆ ӆоват ус. Ма ӆувеӆ патан вусэм. Ин похием 12 таӆа йис, хутмет класс утаӆыты етшаптас, ӆапатмета питас.
Еӆӆы Анна Романовна тумтака ат уӆ па вещката рупитаӆ. Тамащ самаӊ хоятат муӊ ханты хоятӆув кутан уӆӆат па яма рупитӆат. Муйн верытӆат, ванан уӆты хоятӆаӆа, щитан нётӆат.
Иван Сандрин ханшам потар
Авторы
Лух Авт
Темы