Лух Авт
Хон рут эви
Парасковья Ивановна Возелова — хон рут эви. Ӆув ёӆта хот пелак опращаӆ Туляхова. Рат хар хоятӆаӆ Поращ куртан усат. Аӊкеӆан-ащеӆан Паращ нэмна маса, хантэт кутан щиты щи айӆӆа. Ин, ванта, там йисан энамты хоятат воӆаӊ ханты нэм ант тайӆат, щикуш нэмаӆ анта ханты нэм, щи пора хантэт нэмӆаӆ ханты щира толмащсаӆӆаӆ.
Хон рут эви там пуш ярсот пеӆа нийӆ (88-мет) таӆа йис. Уӆмаӆ хуват тащ хотан ийикеӆ пиӆан Горковской нэмпи совхозан яӊхсаӊан. Няврэмӆаӆ иса вутан сэма питсат. Рупатайӆ хуват ар мойӆапса нэпекан мойӆыса, медалят па орденат тайӆ. Ӆув Ун Ляль пора хоят. Щи шукащ пора аӊкиӆаӆ-ащиӆаӆ эӆты хуӆлийс: хуӆ-вой веӆсат, ям таӆӆысат, хуӆ соӆытсат па сораӆсат. Ӆын щи шук пора эваӆт шеӊк потарты ант ӆытсаӊан. Парасковья Ивановна (Паращ) похӆаӆ иса армияя яӊхсат. Мет ун похаӆ Германия муван кат таӆ ус. Ӆув щи моӆты пора Кевн яӊхас. Ун похаӆ нык хащмаӆ юпийн Паращ ийикеӆ пиӆан шеӊк самӆан хошисӊан, ӆын веран, уӆапсайн еӆӆы нэмоӆты няврэман ант туса. Касӆапса вер щит ӆаварт уӆапса, щита туп таксар хоят уӆты верытаӆ. Ин там унты вутан яӊхты уӆапсайӆ номасан шавиӆӆы: онас юшӆаӆ, хотвоӆ лотӆаӆ, тольпайӆаӆ. Ӆув ивеван телевизор хуват ханты уӆапса эӆты вантты ӆытӆа.
Парасковья Возелова сэма питам куртыеӆ, щит Поращ курт. Поращ курт паӆ саӊхаман омасаӆ. Ӆуӊан кашӊ хатӆ тыеӆ-тохеӆ паршаӊ хопат яӊхӆат. Ханты рутат моӆты кем иса куртӆаӆ щимащ лотан уӆӆат, иса йиӊк сыӆан, унт сыӆан. Моӆты порайн там куртан уӆапса аӆ курыйс. Щи куртан энмас па сэма питас хон рут эви. Аӊкеӆан-ащеӆан Паращ нэмпи нэман понтса. Ай пора эваӆт тащ хотан энмас. Ащеӆ Иван Кириллович па аӊкеӆ Анна Ивановна унтан яӊхсаӊан па щи юпийн Поращ куртан уӆты питсаӊан. Щита ӆын хуӆ веӆман усӊан, щита паварт хот омассаӊан, ӆуӊан па урхот ӆонщиӆысӊан.
Поращ куртан щита Туляхов рут хоятат усат. Ин туп таӆ курт лотаӆ хащас. Йи хотые антам, йи юх па ант шияӆаӆан, ӆуӊан таӆ паӆ торан энмаӆ. Хуваншак курт иса тутан ёсса. Ин там унты Паращ щиты такан самаӆ яха щамарӆа па сэм йиӊкаӆ этаӆ хун энмам куртаӆа яӊхиӆыйӆ. Ин туп щита ӆуӊан паӆ торан энмаӆ, таӆан па нави ӆонщ оӆаӆ, нэмоӆты хоят тур сый щита ант щащаӆ…
Любовь Возелова ханшам потар
Авторы
Лух Авт
Темы