Лух Авт
Хорасаӊ вантопса хар верыӆыса
Хон мув воӆаӊ вошеван там пуш верам вантопса хар хусмет пуш манас. Еӆпи, там вантопса ӆэщатты хоятат номас тайсат, Овс мув шимӆа хащам арсыр мир ёх кутӆаӆан яха уйтантыты ураӊан, Москва вошан ун уйтантопса верты. Ай куртатан, вуӆы хотатан уӆты тус ёшаӊ па сыяӊа арыты ёх вантопсая вохиӆыты.
Ин там харан Овс мув шимӆаӊ мир хоятат таӆаӊ ӆапат уӆты щирӆаӆ-пищӆаӆ альсат. Ямал мув хорамат вантопсайн этаӆтаты Тазовской, Пуровской, Красноселькупской, Ямальской па Ӆорвош районат эӆты хоятат ёхтыӆысат. Кашӊ шимӆаӊ мир ёх ӆув мув сыӆэӆан уӆты хот ӆыпиӆаӆ, ӆуматты сохӆаӆ, ӆэтотӆаӆ этаӆтасат.
Муӊ округев вантопса харан вуӆыйн кирам хорамаӊ нэӊат ухаӆ па вуӆы хот ӆэщатман ус. Ухаӆ пуӊаӆан, хотхаран, Тёрку Сэротэтто тахты эӆты омасман ай ухӆыет верман опсас. Тынаӊ кев витринайт хоща тус ёшаӊ хоятат верам пормасат вантты щира понман усат. Вантопсайн кашӊ хатӆ мастер-класс туты хоятӆув рупитсат. Аканят, хирыет, сак лопсыет, юх эӆты соӆ понты аныет, кураӊ вой оӊат эӆты ёнтасты ӆуйт, хорамат версат па мойӊ хоятат утаӆтасат. Катра пораятан ёнтам, яӆап щир нумасты па ай няврэмата пора хайман, аматты ёнтты отат па усат. Рущ хоятат умащӆыман ёнтсат, ох веӆамӆаӆ шукатман нумассат, муй щиран ёшан катаӆты от оша пайтты.
Ар пелак харатан Воӆаӊ Ляль етшам нийӆъяӊмет таӆ постаты вантопсайт ӆэщатман усат. Муӊ округев хуӆам атэӆ хар тайс. Тазовской район вантты харан иса Воӆаӊ Ляль манам верат эӆты вантопса ӆэщатман ус. Хоты вуӆэӊ па хуӆ веӆпасӆаты ёх ляль порайн нётапса тусат. Каш альты ёхтам няврэмат ляль пора верат якман альсат, муй щиран щи порайн нюкния ӆуматӆыйм нэӊат хоӆап таӆсат, хуӆ-вой веӆпасӆасат, сох татаӆсат, ёнтассат, ӆэщатам пормасат ухӆата хушсат па онасат вош пеӆа тусат. Потам йиӊк эӆты ёшӆаӆ, курӆаӆ нох пувӆам, рупитты метам нэӊат, ӆавӆасман ныкӆы пеӆа вантӆат. Щи тумпийн, вантопса ӆарпитам харатан, ляль пора арат кашӊ мир ёх ӆув рут ясӊеӆан арысат.
Вантопса манты хот лепан, каман, Тазовской район па Югра мув эӆты тувам кат вуӆы хот ӆощаӆтаман усӊан. Хот ӆыпия ӆоӊтыты рахас, каврам шай йинщты, арсыр щиран ӆэщатам нёхи, хуӆ па вонщам отат эӆты тащ верам ӆэтот ӆэты. Ӆов тащат шавиты ёх па юрта хот этаӆтасат. Тынасты харатан нёхи, хуӆ, вонщапса эӆты кавартам мав хошапат, па па хорпи арсыр ӆэтотат тынысайт.
Ӆорвош район эӆты Любовь Гавриловна Витязева арыты па якты утаӆтаты няврэмӆаӆ пиӆан, Галина Гавриловна Артанзеева, Пулӊават вош эӆты Елена Александровна Рыбина «Тут суӆтам» туты группайӆ пиӆан ханты арат арысат, нарасӆысат па яксат. Многопрофильной колледжан утаӆтыты эвет ур, ёрн ёх па унт урат ясаӊан арэмисат.
Ямальской район эӆты вуӆы хотан яӊхты кат ур нэӊӊан таӆан тайты сох тэӆ вантопсая тутӆысӊан. Елена Рыбина па ӆуӊан ӆуматты ханты сохат аляс.
Округев ӆэщатам вантопса харэв оӆаӊ местая этас. Гран-при мойӆапса Югра мув па Камчатской мув сыӆ усат. Верантты, ёнтасты, якты па арыты хоятӆув ищи арсыр мойӆапса нэпекат шитсат. Вантопсайн уӆам хоятӆув еӆпи уйтты хоятӆаӆ пиӆан уйтантысат, кутӆаӆан яӆап ӆухас версат. Па мув хорамат вантсат, арат хуӆантсат па амтатӆысат.
Зоя Куртямова ханшам потар
Авторы
Лух Авт
Темы