Лух Авт
Хорсащты пора ёхтас
Хащам вет таӆ вутыя ки, там таӆ округеван 2,1 пуш аршак вуӆы нёхи хорӆа. Таӆ етшаты унты хуӆам щёрас ветсот пеӆа ветъяӊ тонна нёхи ӆэщатты вер уӆ.
Округ кущаев тащ хотатан рупитты ёх пиӆан уйтантымаӆан, партапса верты ястас, нёхи маты тынаӆ нох эӆатты. Щитаӆан ванта, нёхи аршак хорты питӆа, вуӆэӊ ёх нёхи сахат шитты охаӆ еша энамаӆ, вошаӊ хоятат ӆапкайн нёхи ӆутты верытӆат.
«Ӆорвош районэван ӆоватаӆан няӆсот пеӆа ветъяӊ вуӆы хорты утщиӆа. Няӆъяӊ пеӆа няӆ тонна нёхи ӆэщатты. Таӆаӊ таӆа понам план эӆты курк па ай кер тыӆщатан ӆапатхощъяӊ тонна мийман уӆ.
Там пуш хорсащты хара мет оӆӊа ветмет бригада ёх ёхатсат. Нийӆъяӊ пеӆа ӆапат вуӆы тусат. Мийм нёхеӆ кат щёрас ӆапатсот киӆая хойс. Щутщаты хатаӆан нёхи маты верэӆ етшас.
Ӆапат няӆмет хатаӆан хуӆмет бригада вуӆыӆаӆ пиӆан вана ёхатсат. Ӆув юпеӆан оӆаӊ па кимет бригадайӊан ёхатӆат. Мет ёӆта няӆмет тащ хорсащты ёхатаӆ.
Вуӆэт хорты юпийн, нёхеӆ потаӆтаты хошапат ӆыпийн шавиӆа. Мет оӆӊа ашкуӆаята, ай няврэмат хатӆ сыс яӊхты хотата, леккар хотата нёхи туӆа. Аӆ хоятата ищи тыныты питса. Там пуш вуӆы нёхи тынаӆ йи киӆа сахат ветсот пеӆа няӆъяӊ соӆкувая хойс.
«Горковский» совхоз ищи хорсащты харӆаӆ ӆэщатман тайӆаӆӆаӆ. Туп тащӆаӆ хоӆна Ас ант вуншсат. Там пуш шеӊк хув мелак хатӆат ӆойсат па еӊкаӆ хоӆна ухаӆ», ¬– «Мужевской» совхозан рупитты ху Владимир Иванович Гарбузов ястас.
Зоя Куртямова ханшам потар
Авторы
Лух Авт
Темы