Лух Авт
«Хотаӊ тыхаӆ» мойӊ хота ёхтыӆыяты
Пора сора манаӆ. Таӆаӊ таӆ хащас, хоты Питӆоран «Хотаӊ тыхаӆ» хот мойӊ хоятат кеша пуншса. Хотаӊ нэӊаӆ Лидия Егоровна Нева. Шоши муваӆ хорамат альты, уӆты хоятӆаӆ па ханты уӆапсайӆ ишакты ураӊан тамащ номасан ёхатса. Номпса понам вераӆ еӆӆы туты ураӊан муниципальной грант ох па шитас.
«Нюрам мув ӆыӆ» емаӊ хатӆ мет оӆаӊ пуш верам порайн Лидия Егоровна пиӆан уйтантысман. Пулӊават вошан округ ӆоват каш верты хот камн верам сцена хоща ӆув хорамаӊ турсыйӆ шеӊк хува щащас. Хоятат ёш паты сэӊкман сыйӊ араӆ ӆув пиӆаӆан арысат.
Там тусаӊа арыты ханты нэӊиев муй иса хошаӆ. Ийикеӆ нётман хуӆ веӆпасӆаӆ, хорам сохат ёнтаӆ, ов хараӆан лыптат энмаӆаӆ ин па мойӊ хоятат кеша «Хотаӊ тыхаӆ» хот омпсас.
«Манэман там уӆапса ӆаварт щах антом, ай тэӆан хотан энампсам. Емаӊ хатӆат постаты порайн ма иса хот омпсыӆысам. Хоятат хот ӆыпия ӆоӊтыӆат, вантӆат, инщасӆат. Ин иса туризм пеӆа вер кератӆа, ма па щимащ номас понтсам. Верты верэм уйтӆэм, хот пормас тайӆам, ёнтам сох па уӆ. Хот мохиӆаман иса нётӆайм.
Мет оӆӊа 2022-мет таӆан, хотэм пушмем порайн, Москва вош эӆты мойӊ хоятат ёхтыӆысат. Щи юпийн Хон мувев хуват ар тахайт эӆты вер онтасн манты-яӊхты хоятат питсат хойӆыты. Куртаӊ хоятӆам па ӆоӊтыӆат. Веӆмаӊ ӆантан, эпӆаӊ хошъйиӊкан, каврам шайн мойӊ хоятӆам иса ӆапатӆаӆӆам. Шай такӆы хоты муй щиран. Хот ӆыпийн ям, хошам, пасан суран аяӆта потар манаӆ», — Лидия Егоровна ястас.
Лидия Егоровна номпса понам верэн еӆӆы туви, хотэн иса тэӆаӊ ат уӆ. Муй хорпи муӊ мувев хорамаӊ, ханты хоятӆув муй щиран уӆӆат, хоты вератты, ёнтасты, рупитты па каш альты хошӆат па Хон мув щуӊатан иса ат уйтӆат. Ун пумащипа ясаӊ наӊен ястаӆув.
Зоя Куртямова ханшам потар
Авторы
Лух Авт
Темы