Лух Авт
Хотат омасӆайт, хоятат касӆаптаӆайт
Хащам ятан округ ӆоватан кашң куртан, кашң вошан артан хот омасӆа. Щи верат ЯНАО губернатор Дмитрий Артюхов такан вантман тайӆаӆӆы. Кум шиттаӆан, яӆап хота ӆоңты хоятата, томан няӆам ёша катӆаптаӆ.
Там ӆапатан Пулңават вошан Обдорской микрорайона касӆаптаты хоятат томан няӆам ёша пайтсат. 148 семья яӆап хотан уӆмитаӆ. Арпелак хоятат, иӆ куламты вутщийм хотат эӆты, касӆаптыӆат.
«Округ воӆаң вошан катра хот эӆты касӆаптыты щир — мет мосты вер. Хун муң каматса таӆ сайн постасэв, хоты сахат аршак хоят яӆап хотан маты, моштасэв, йи-кат хотан кашң районан омасман верэв еӆ ант хатаӆ. Щишан номас версув Обдорской микрорайон сыстам нюрам харан омасты. Хун муң ӆувеӆ таӆаң тэӆан омасӆэв, тата вет щёрас семья уӆты питаӆ — щит Пулңават вош хуӆметаӆ. Ин оӆаң хотат омасты етшасув, рахаӆ ястаты, веӆщи питщасув. Обдорской — щит антом туп яӆап хотат, щи тумпийн яӆап уӆапса», — ЯНАО губернатор Дмитрий Артюхов ястас.
Томан няӆам ёша пайтам хоятат кутан Дмитрий Степанов ус. Ӆув имеӆ имийя мийм хот эӆты томан няӆам вус па муңева каматса ясаң ястас: «Ма имаем Ангальский мыс хоща катра хотан ус. Шеңк хув очередь щиран ӆойс. Ёхатты ант верытас па щишан ма томан няӆам ураңан ёхатсам. Ясаңан ёхатмев юпийн шеңк аматсув. Ин туп мосты пормасат яӆап хота ӆутты мосаӆ, кашң ӆув тахаяӆа омасты. Мосаӆ ун пумащипа ястаты, кушкепа ун хоятӆув верытӆат яӆап хотан туңа щира уӆты».
Пулңават вошан ЖК «Береговой» хоща яӆап хотат ищи омасӆайт. Антом туп вошаң хоятат, щи тумпийн куртаң хоятат тата ищи хот ӆутӆат. Матрёна Константиновна Русмиленко Ӆоркурт эӆты там жилищной комплексан хот ӆутас. Каматса ясаң ястас, муя па щимащ номасан ёхатса: «Няврэмӆув энамӆат, еӆӆы утаӆтыты манӆат. Ин Эдуард похем яртъяңмет класса манас. Щи юпийн ищипа еӆӆы утаӆтыты мосаӆ, уӆты мосаӆ. Щишан номас понтсув Пулңаватан хот ӆутты. Долевой строительство щиран ЖК «Береговой» пирысув. Ванты, щита омасты хотат антом шеңк паӆат, мир шимаӆшак. 2026-мет таӆан иса таӆаңа йиӆ, етшаптаӆа. Семейной ипотека щиран 6% сохаптаты питӆув. Щит шеңк ям, ант мосаӆ ар сохаптаты».
Ин округ ӆоватан турамсот программайт рупитӆат, кашң хоят верытаӆ ӆувеӆ рахты программа пирыты, хот ӆутты. Щишан, нумастэман, еша уӆты иӆ куламты хот Пулңават вошан па ант кащаӆаӆув.
Аллина Тоярова ханшам потар
Авторы
Лух Авт
Темы