Лух Авт
Хоттэӆ хоятӆам потрат
Хоттэӆ хоятӆам пиӆан арсыр муват хуват яӊхӆув, камн хоятат пиӆна яха ёхтыӆыӆув. Юхат вантам верӆув нэпека ханшӆаӆӆув. Там лопасан Елизавета ай эвем ханшам потар ӆуӊтаӆн.
Восна унӆтам рут ясӊем
Вуща уӆаты, вуща уӆаты, вуща уӆаты! Ханты уӆапсаям эват йиӆап хансапса ма яра, Порават ныӊ Елизавета Накова, ӆэщатсам.
«Нул юх» потар хар. 1999-мет эват 2014-мет таӆ моса опем Лилийи па яйм Елисей «Нул юх» нэмпи потрат няврэмат куссы омем пиӆна ӆэщатсат.
2014-мет таӆна манэм вет таӆ ус. Щи порайна «Радио Ямала» хоща рущ ясаӊна «Россыпи Севера» оӆаӊ потар тайсам. Юхат «Нул юх» потар хар ханты па рущ ясаӊна ӆэщатты омемна вохсаям, касащсам.
«Лизавета потрат»
Хоттэӆ нэӊхыӆам пиӆна таӆан-ӆуӊан щучаты хатӆатна мувӆув хуват яӊхӆув. Рутэв пиӆна яха ёхтыӆыӆув, потарӆув. Вантам, хуӆам верӆам юхат яӆан потарӆаӆам. Яймна Елисейна нётӆаям. Нэпекна понӆаӆы, тоӆмащӆаӆы рущ ясаӊ пеӆа. Щиты манэм унӆтасӆы.
2014-мет таӆ эват па 2022-мет таӆ моса хоттэӆ нэӊхыӆамна нётман ханты па рущ ясаӊ пеӆа тоӆмащам «Лизавета потрат» ясаӊ хар ӆэщатсув. Щита касаӊ ӆапат юӊкем минут арат потарсам. Вантам, хуӆам верӆам алиӆысӆам.
«Ханты ясаӊ — яха» интернет хуват
2023-мет таӆна, ай кер тыӆащ, оӆаӊмет хатаӆна интернет хуват, АНО «Ямал-Медиа» хоща «Ханты ясаӊ — яха» йиӆап потар харэм этты питас. Итта вус ма яра хансам потарӆам.
Омем рут Кев эват овты Суп ёхан муваӊ нэӊхэт ясаӊна потарӆам. Щи ясаӊ тайтыт там йисна 100 моӆтаскем нэӊхы туп. Яйм Елисей па опем Лилийи ӆын Порават ху ащем ясаӊ щирна ар пелак потарӆаӊан.
Потар харэм ӆэщатты омемна нётсаям. Тухаӆысна еӆамӆам, нумасӆам: Щуктат потрэм рут ясӊемна манӆ, ясаӊ сыяӆам поталэӊи щащӆат. Омем ӆаваӆ: «Аӆ паӆа! Ант мосӆ еӆамты, мола кем верытӆан, ям вура тая, ясӊен еӆащ тайи!»
Номсэмна щи вер ям, Мохсарт нэ щащем — Прасковья Евгеньевна Накова, Порават ху йирэм — Егор Ӆазаревич, Тови пухӆаӊ вуӆомем — Марфа Яковлевна па Юӊквосаӊ ху вуӆащем — Николай Андреевич Сязи ма яра вансаӆам, хуӆсаӆам, ӆув век ханты ясаӊна потарсат, нумассат.
Рутӆам хоща каӆаӊ хотна, хуӆ веӆты лотатна яӊхсам. Омем эӆты хораӊ потрат «Тут суӆтам», «Северный колорит» ӆэщатты нётсам. Щиты щи аяӆтайи ханты ясӊем рутэм мохты уӊӆэмна питас.
Итта вус «Ханты ясаӊ — яха» потарты харэм 20 потарна тукаптасэм, хоӆна рущ ясаӊна тоӆмащӆэм. Тыӆащ йи пус, 10 минут арат.
Интернет мохты рахӆ камн лотна хуӆантты. Сайт АНО «Ямал-Медиа» хоща, щиӆта ВК, группа «Этноарктика», раздел «Аудио», щиӆта «Яндекс Музыка» харна. Хоты верытӆам, щиты ханты мурэм эӆты нётӆам. Сора куссы па ям вуӆам уӆаты!
Герман Наков ӆэщатам потар
Авторы
Лух Авт
Темы