Лух Авт
Хоттэӆат постаты емаӊ хатӆ
Хон мувеван уйт ӆор тыӆащ нийӆмет хатаӆан хоттэӆат емаӊ хатӆ постаса. Щи хатаӆан хольмаӊ пеӆа вет па аршак таӆ яха уӆты, рупитты, ям верат верты па няврэмӆаӆ энмаӆты хоттэӆат ишаксайт. Емаӊ хатӆ кеша «За любовь и верность» меваӆ посан юкантсайт.
Ӆорвош районэван щимащ хоттэӆат ищи уӆӆат. Тата ма Щаня муван уӆты хоттэӆат эӆты потрэм туӆэм, маты отат хащам таӆатан щимащ меваӆ посатан мойӆаптасайт.
Филипп Григорьевич Артанзеев Акулина Петровна ийимеӆ пиӆан «Мужевской» совхоз тащ хотан ар таӆ рупитсаӊан. Пенсияя манман юпийн Ямкуртан уӆӆаӊан. Вет няврэм энмаӆсаӊан. Няврэмӆаӆ, хиӆыӆаӆ ищи тащ хотан касаӆман, хуӆ-вой веӆпасӆаты тахаятан рупитӆат.
Семён Гаврилович па Надежда Егоровна Лонгортовӊан Овкуртан уӆӆаӊан. Щутщаты мантаӆ унты Семён Гаврилович утхот кущая рупитас. Надежда Егоровна ашкуӆа-интернатан воспитателя ус. Ар таӆ арат, потрат, монщат актас. Ханты арат арыты «Щаня ёх» группа ӆэщатас. Хуӆам няврэм тайӆаӊан.
Ксенофонт Иванович па Нина Никитична Неттины айӆат таӆ пораятан ур муват эӆты Овкурта ёхатсаӊан, па пирщематан унты тата усӊан. Хоятат яммаӆтаман ар таӆ леккар хотан рупитсаӊан. Там ванан ӆапатъяӊ пеӆа кат таӆа ӆуӆан йис, хоты ӆын хоттэӆ щира уӆты питсаӊан. 2017-мет таӆан Ксенофонт Иванович антома йис. Эви па пох тайсаӊан.
Там хуӆам хоттэӆ мохет эӆты ар ям ясаӊ рахаӆ ястаты. Вещката рупитмеӆ ураӊан, тэӆые ишакты нэпекатан па меваӆ посатан юкантсайт. Няврэмӆаӆ энмаӆсаӆӆаӆ, хиӆыӆаӆ шавиӆӆаӆ.
Хоят пеӆа самаӊ хоятӆува мойӆапса ясаӊ китӆув. Нын уӆман хуват ёшан хойм тахайн ям пормас понтсаты, курн хойм тахайн ям номас хайсаты. Кен ёшан, кен саман нуптан патэӆ унты туваӆан.
Зоя Куртямова ханшам потар
Авторы
Лух Авт
Темы