Лух Авт
Хоты хуӆ потаӆтаты тахаята еңк ӆэсятӆа
Ар пелак хуӆ веӆпасӆаты хоятат ин ай кер тыӆась унты сютсяты питӆат. Туп рыбоучасткатан па рыбозаводатан рупата ар. Хой хоӆпат сэваӆ, хой ӆуң порая ӆэсятыйӆ, еңк ӆэсятаӆ. Хоты Горковской рыбозаводан ӆуң веӆпасӆаты порая ӆашкупата еңк ӆэсятӆа, ханшӆув.
Горка вош хуӆ потаӆтаты тахайн мастера рупитты нэ Наталья Юрьевна Кулик сит эӆты потар тус: «Горка вошан еңк потаӆтаты хот тайӆув, рыбозавода ӆуңтасӆув, еңк ӆэсятӆув. Ас потты тыӆась хасям хатӆат эӆты курк тыӆась унты 1500 кубической метра еңк сопасӆаӆув. Еңк потаӆтаты хотэв ветъяң метра хуват, вутатаӆ — ӆапатхосьяң, паӆатаӆ кат метра моӆтас. Иса тэӆаңа еңкан понӆэв. Си еңк Асов, Ӆоркурт па Горка вошат ӆашкупата ӆэсятӆайт.
Еңк потаӆтаты хотан катхосьяң хоят рупитаӆ. Няӆ хоят еңк ӆэсятаӆ. Рупитты хоятат 720 квадратной метрайң хошап йиңкан шошамӆэӆ. Еңк потаӆтаты хотан иськи. Сишан хатӆ сыс йиңкаӆ мохты потӆа. Еңк ураңан атэӆ хошап верман уӆ.
Еңк порлийн антом шеңк ай пулата шукатӆа. Транспортёрной лента хуват еңк пулат дробилка унты манӆат. Сита ай пулата шукатӆайт па па си лента хуват кимӆы унты, хота ӆашкупат ӆойӆат, ӆарасята понӆайт.
Хун хуӆӆаӆ ӆашкуп эӆты ёхӆы туӆайт, лёхитӆайт па хольмаң киӆа ӆарасята понӆайт. Хуӆӆаӆ пирыӆайт па атэӆ ӆарасята шоковой хуӆ потаӆтаты камерая, Пулңават воша хуӆ ӆэсятты хота китты унты, ӆэсятӆайт. Няӆ симась камера тайӆув. Таӆан хуӆӆаӆ потаӆтам сирн тайӆайт».
Горка вош рыбозавода Асов, Ӆоркурт па Горка вош хуӆ веӆпасӆыты хоятат ӆуң па таӆ сыс мосятты хуӆӆаӆ мийӆыӆат. Сиӆта хуӆӆаӆ Пулңават воша хуӆ ӆэсятты тахаята китӆайт. Сита умась хуӆаң ӆэтотан ӆэсятӆаюв. Кашң округ па па мув хоятат си хотан верам хуӆаң ӆэтотат ӆутты па умасьӆыман ӆэты верытӆат.
Альбина Тырлина ханшам потар
Авторы
Лух Авт
Темы