Лух Авт
Хоты имет ятлащты питсат
Имеӊан-икеӊан усӊан. Ийикеӆ вой веӆас, хуӆ веӆас. Каӆаӊат тайсаӊан. Имеӆ ямас ёнтасас. Ёнтасты каӆаӊ сохӆаӆ, ассат ӆэптат, купаӆӆаӆ ищи. Щи порайна имет ант ятлащсат.
Моса хорпи каӆаӊ хорӆа кепа, икетна каман, хотащ ӆэпатты верӆа. Имет щи порайна, ассат яӆан усат. Ким аӊкарматы ант рахас. Йис тэӆна, щимащ вер уӆмаӆ, хоӆна ай эвет тэӆна, ким ант эсӆыямат. Икет каман каӆаӊ хортэӆ. Веӆащ хорам каӆаӊ сох, имиӆаӆ эӆты ёхи тутэӆ, нюр ямас, ёнтасты хорпи ӆэпатты ювам сох. Щи юпина икет нёха ӆыты щирна ӆэщаттэӆ. Яха нёха ӆыӆат, щи юпина нёха хощ эватлитэӆ. Имет, веӆащ хорам нёпалув эваӆт, мохты ёнтасты веритмеӆ.
Имосайна ики, ям хорамаӊ самарутка сыюв тынщаӊна мощатас, имеӆ эӆты сах сох ураӊна. Яӆта вус, ӆувеӆ мосты пормасӆаӆ, ким этас. Каӆаӊаӆ хорты питас. Имеӆ яӆан ус. Ӆув ущас, ким хотаӆ эваӆт, аӊкарматы ант рахаӆ. Еӆпи уӆам имет, омет, щащет, аӊкаӊкет, ассат яӆан омасмеӆ. Икиӆаӆна, етцам сохна, ёхи ласкиямат. Ики имеӆ, щикем ӆытты питса, ким аӊкарматы. Вурайна нарэӆ хоща, омасты веритаӆ. Карра икет, каӆаӊ хортэӆ порайна, туп сох нёхаяӆ эваӆт хощ паяттэӆ, мохты няр сох, паӆӆаӆ па сэм вусӆаӆ эваӆт катӆыман, ранькатэӆ. Сох нох сораӆ. Па ранькатэӆ, ятлам хорпи питаӆ. Хуӆметты ранькатэӆ юпина, воӆӆы ӆэпатты йитаӆ. Ики ӆэпат сох имеӆ эӆты матаӆ. Рахаӆ мохты эӆсох ёнтты. Щи юпина каӆаӊ нёхаяӆ, ӆыты щирна ӆэщаттаӆ. Нёха ӆытэӆ юпина, хощ эватлитэӆ. Щи порайна, имет воӆӆы ант ятлащмеӆ. Купӆат тэӆна, тахты пиӆна, ӆэпатты ювмеӆ. Имет туп ёнтасмеӆ па щи.
Там ики, па каӆаӊ хорты питмаӆ. Имеӆ яӆан омасмаӆ. И лотна ант хантаӆ. Нумасты питмаӆ: «Ай ув хул эваӆт, ванӆам кепа, ийикем ант мостаӆӆы. Ӆув хаӆща ущаӆ?» Щаӆта па парта, номсаӆ кератӆаӆӆы: «Карра имет, щи веритмеӆ, ант вантты. Мосаӊ хой кепа вантас, туп ант ӆавас?» Ими нох ӆояс, аяӆта ув пеӆа манас. Ай ув хул эваӆт, вантты питас. Щи пуляӊ, ийикеӆ, каӆаӊ сохаӆ, нёха эваӆт нох паятмаӆ. Няр сох паӆӆаӆ эваӆт ёсна катӆащас. Ранькасӆы, сохаӆ ищи хорпи няр, па ранькасӆы, па ищи хорпи няр. Хуӆметты ранькасӆы, па ищи хорпи няр. Ики хощ ликащас. Няр сохаӆ пиӆна, вуӆ курамна, хотаӆ пеӆа манас. Имеӆ вурайна, нарэӆ пеӆа кураптыяс. Икеӆ ёхи ӆаӊемас, имеӆ эӆты няр сох, тохи вощкасӆы. Еӆ ликащман увтыман ӆавас: «Итта питӆаты, няӆӆан мувна хойты моса, каӆаӊ сохат ӆэптамты. Ятлащты, ювӆасты, татӆасты. Хойна парсаян, кимащ вантты? Па имет ассат веритсат, яӆан омасты. Хощ щёпитсэн, икет ӆэптантыям щир. Наӊ антасэнна, верӆы имет, ассат, сох ӆэптамты питӆат». Ими паӆтамас па, нэмаса ант ӆавас.
Щи юпина, икет хоты кепа, веӆащ хорам няр сох, ранькиӆӆаӆ каӆаӊ сохат, ӆэпатты ант йиӆат. Питсат юхат, имет ятлащты. Кат-хуӆам хатаӆ, юхат и сох ӆэптамсат. Ятлащтэӆ-ювӆастэӆ эваӆт, няӆӆаӆ воӆӆы мувна ёхатӆат. Сас касы, ёс касы тайты питсат. Ятлащты ант веритты имет, атмащ ёнтасты питсат. Веритты имет, ямас ятлащӆат па ювӆасӆат. Эӆ сохӆаӆ ямас верӆат. Ям ӆэпат сох эваӆт, каман эӆсох, асса ямми ныӆа. Ёнтты ям щимащ ӆэпат сох. Щитна моса рут кепа, хуӆантты мосаӆ, вуӆ нэӊхет пеӆа. Рут щир, ант мосаӆ, суппи вунсты. Ими эӆты ант ки рахаӆ вантты, яӆан ат уӆ. Антат вантаӆ, хоӆащ вантты ант рахаӆ. Щиты рут щират, суппи вунсты питӆат ки, ханты имет. Опаращӆаӆ щират, асса яремаӆӆаӆ, ясӊев па яремаӆэв, ханты юканны хоты уӆӆув? Вериттэв кемна, ханты щирэв, еӆащ туты верэв уӆ. Щи.
Антонина Сязи (Серасхова) ханшам потар
Авторы
Лух Авт
Темы