Лух Авт
Хоты коми-пермякат хоща колядкайт манӆат
Финно-угорской мир хоща Рождество постаты щир эӆты этнографата па щи мувата яңхиӆыты мойң хоятата шеңк умащ уйтты. Хоты там емаң хатӆат коми-пермякат хоща манӆат, щит эӆты «Иньвенский край» нэмпи газета главный редактор Елена Ивановна Коньшина каматса ясаң ястас.
Коми-пермякат нумасты щиран, Рождество манты порайн мет атом па паӆтап верат уӆӆыӆат. Кашң хоят ӆув уӆты хотаӆ сыстапӆаӆӆы, щуңӆаӆ санан кушмаӆӆаӆӆы, муӆ тахайӆаӆан Турам хорат пеӆа пойкащиӆат, ям уӆапса вохиӆыӆат. Кашң ован перна пос щуртыӆыӆат атом вер ӆув хощаеӆ ант ёхатты ураңан.
– Хоты па финно-угор ёх кутан, муң хощаев ищиты арпелак верат тыйӆыӆат. Хун хота мет оӆаңан мойӆантытыя ху ки ӆоңаӆ — щи порайн хотаң воен арашак йиӆ, нэ ки мойӆантыты ёхатаӆ — нэмоӆты ям аӆ ӆавӆа. Щишан хотаң хоятат нэ ёхатты порайн ликащисат, хонна верытсэӆ еӆ нюхаӆтыя.
Святкайт манты порайн, кашң ӆаңхас ӆув еӆӆы уӆапсайӆ эӆты уйтты па моштаты, муй еӆӆы ӆаваӆты. Хоты кашң мир хоща, асвеча воск йиңка посытты вер эӆты моштыӆыса па потартыса, хоты аратаӆ верат еӆӆы манты питӆат. Энамты эвет ӆант хуват уӆапсаеӆ артаӆысэӆ. Кашң нэ ёша ӆант вуйӆыйс, па ӆув ещаӆтаӆ пасана шошмиӆыйс, па потартыйс — хой аӆаңшак ху сая манаӆ, па ихуяӆ хорасаң ат ус. Щаӆта ху щищкурэк эсӆыса, хой хоща шошмам ӆант ӆув ӆавемийӆ — щи нэ постам вераӆ сора тыйӆ.
Щаӆта валщаман ищи рахас щимащ ёнтопсайт верыӆыты. Кашң нэ валщам нёхрыӆыйс, щаӆта Рождество еӆпийн каматса хатӆа ӆонща тэвӆыӆыйс. Мет воӆаң емаң хатӆ еӆпийн нох вущемисӆы. Хоты валщамаӆ ӆэты питаӆ, щит эӆты моштыӆыса, там пуш щи нэ ху сая манаӆ муй па антом.
Энамты няврэмат ищи ёнтопсайт верыӆысат, хотат кутан яңхиӆысат, колядкайт альсат. Моӆты вой па щищки хораса ӆуматӆысат. Арат арэмисат, ёнтыӆысат, нарасӆысат. Щи юкана хотаң хоятатан мойӆапсаятан мийӆысайт. Катра порайн, щит арпелак ӆэтотан, хой муй тайс — щит щи мийӆыйс.
Аллина Тоярова ханшам потар
Авторы
Лух Авт
Темы