Лух Авт
Хоты ма тащ хотан энмиӆысам
Ащем Поравт ху Наков Егор Лазаревич, сэма каӆаӊ хотн питас. Уӆмаӆ хуват аӊкем пиӆн касӆыӆыман усӊан. Мета хув пора тащ кущая понман ус. Инта унты, касӆыман таям кев вуншты юшӆув уӆӆат.
Ӆуӊ юшӆув хорасӆаӆ ин ныӆайт Хаӆащ ющарн, Монет нёӆн, Паты хотвоӆ лотн, Ваншеӊ ӆухн, Хаш нёӆтай кеваӊ хотвоӆ лот. Хантэт касӆыты лотат, ин щи муват Полярный Урал щирна рущ ясаӊн аяӆӆайт.
Ащем верантты ики ус. Камн хорпи ухаӆ хошас вертыя. Каӆаӊ хотн муй пормас мосас, иса хошас вертыя, ӆаямн па кешийн шеӊк хорама верантты хошас па хоӆна сора.
Ай уӆмемн, манэм хатмиты ай ухаӆ верс, яӆта курӆаӆ перная верман усат. Рэп эӆты хатмиман тайсэм. Хоӆна ӆохат тайсам, ӆыс вантман тайсаӆам, щи порайн ма ащеман тащн тутӆысайм, каӆаӊат вантты яӊхсам. Мин Леонид яйм пиӆн вотча ухаӆн яӊхсаман.
Оккайт тайсув. Ащем Римма опема ай окка пеши мойӆаптас. Аӊкиӆы хащам ай пеши, ур хотн энмаӆсэв. Опемн ӆапатман тайса. Оккаяӆ нэм таяс Нёвтыйи. Нёта, камн арат восты лыпат, варс лыпат Римма тутӆыйс, щи ураӊан ӆувеӆа питс. Юхат, оккайӆ хун энмас, кашӊ тови ай пеши тутӆыйс.
Мет оӆаӊ пешеӆ Хулхия аяӆсэв, юхат Ханшийи, Вуртыйи, Нави ёш, нэмӆаӆ ар хорпи усат. Хулхие оӊатӆаӆ тащн мет, мет хуват, унат усат, еӆта ныса. Вохӆэн па мохты манщак аӆэммаман, наварман йиӆ, нянян па хошъйиӊкан энмас.
Ханшийи хун уна йс, оӊатӆаӆ ищи унат усат, ащемн тайтыя ухӆа кирыӆыса, юхат шеӊк ликаӊа йис. Юхат па, хун мощатӆа, тынщаӊ хуват ещаӆ йил, хоят эӆты ант паӆаӆ.
Ащем манэм ищи кат каӆаӊ мойӆаптас. Итӆ ун няровой хоптыя ювиӆыйс, кимет отаӆ ныӊ каӆаӊа йис. Тови порая йитаӆан, пешет тутӆыйс. Яем па ай апщиӆам, ащемн ищи калаӊатан мойӆаптысайт.
Герман Наков ханшам потар
Авторы
Лух Авт
Темы