Лух Авт
Хуӆ веӆпасӆаӆа, план тэкаптаӆа
Хащам ӆапатан округ ӆоватан хуӆ веӆпасӆаты ёх ноптаӆты хопӆаӆа ӆэӆапсат. Ванты Ас нопатты тыӆащ хусмет хатӆ вуш эӆты унщ тыӆащ ветхощъяңмет хатӆ унты Асан хуӆ веӆпасӆаты ант рахас.
Яӆап таӆа питам вуш эӆты округ ӆоватан 1 200 тонна мощатса. Щит, хонна туняӆ таӆ пиӆан артаӆаман, шимаӆ. Ванты еңкев сора ант манас, ищипа нумасӆа планат тэкаптаты, морт арат хуӆ ӆашкупата маты. Хащам таӆатан 12 щёрас тонна моӆтас мийӆыӆа. 2023-мет таӆан 12 128 тонна мийман ус.
Ин арпелак хуӆ веӆпасӆаты ёх ӆоран па туватан хуӆ мощатӆат. Ямал ӆоватан ярсот предприятий уӆ. Ӆув онтасэӆан муң хонна верытӆув, хуӆ пул уңӆа хошкитыя, йис ӆэвпасэв ӆавемитыя. Ӆапкая яңхман тащ ӆэтот ӆутыӆытыя.
Там хатӆатан артан сорт, мевты, ханшаң хуӆ, паннэ хоӆпата хойӆыйӆ. Шеңк такан АО «Горковский рыбозавод», МП «Аксарковское РПП», ООО «Святогор», ООО «Верхнетазовская рыбодобывающая компания» рупитӆат.
Кашң хуӆ веӆпасӆаты ху тут йиңкан, хоӆапан, мосты пормасан иса маса. Хуӆ ӆэтота ӆэщатты предприятияйт яӆап хуӆ ӆаваӆӆат.
Мир ӆапатты ураңан рупитты ёхӆув па нэңӆув тумтака ат яңхӆат, артан хуӆ ат веӆӆат. Шимаӆшак вотаң па пеӆңайң хатӆ ат уӆ. Тумтак ёш, тумтак кур!
Аллина Тоярова ханшам потар
Авторы
Лух Авт
Темы