Лух Авт
Хуӆ веӆпасӆаты ёх емаӊ хатӆ
Уйт ӆор тыӆащ кимет ӆапат щутщаты хатаӆан хуӆ веӆпасӆаты ёх емаӊ хатӆ постаӆа. Шоши мир ёх хоятӆува щит шеӊк воӆаӊ хатӆ. Катра пора эӆты ханты хоятӆув хуӆ веӆпасӆаман усат.
Хуӆ веӆпасӆаты хоятӆува ӆуӊ сыс хатӆат мет рупатаяӊат. Туп емаӊ хатӆ кеша ищи па кум шитӆат яха уйтантыты, мойӆантыты.
Там йисан куща ёх пиӆан анта туп утхот пасан суран, емаӊ хатӆ порайн хуӆ веӆпасӆаты тахайн, потар кашн моӆты вер сахат потрэматы па рахаӆ. Муй хорпи яӆап партапсайт этсат, план щиран рупатаеӆ хоты манаӆ, иса инщасты, ӆэрапты. Ивоӆап, воша ант яӊхман, мосты нэпекат ӆэщатты.
Емаӊ хатаӆан леккарат па ёхтыӆысат. Йи тахайн уӆман, ун хоятат, ай няврэмат мохты вантсайт, прививкайн понтсайт, сопас портунан масайт.
Щи кут каш ӆэщатты ёх арысат, яксат, ощхуль вантопсайт альсат. Кашӊ хатӆ ӆаварт рупата верты ёх, там хатӆ еша щутщасат, ёнтсат, касапса харан юращсат. Рупата щиран план тэкаптаты, вещкат па апраӊа рупитты ёх ишакты нэпекатан па мойӆапсаятан мойӆаптасайт.
Йи ун рат харан эпӆаӊ шай па хуӆ кавартса, няр хуӆ ӆэщатса, нэӊат пасан омассат. Яха актащман, няхман, ёнтман, там найӊ хатӆ манас.
Емаӊ хатӆ етшас. Куща ёх па мойӊ хоятат воша мантсат. Хуӆ веӆпасӆаты мохиӆува па щи кашӊ хатӆ, аӆаӊсахат эӆты етна унты мосаӆ хоӆап вантты, ноптаӆты, хопӆаӆ-моторӆаӆ ӆэщатты, ӆуӊ сыс ханшам планэӆ тэкаптаман ӆашкупа хуӆ маты.
Тумтака уӆаты, хоттэӆ мохиӆан нын пиӆанан иса ванан ат уӆӆат, нётӆат. Йиӊк хоща, ханты мир ёх ӆуӊхатан ат шавиӆайты. Таӆаӊ ёш, таӆаӊ кур, еӆӆы пеӆа.
Зоя Куртямова ханшам потар
Авторы
Лух Авт
Темы