Лух Авт
Хуӆ веӆпасӆаты ёх пиӆан уйтантысат
Хащам ятан Ӆоркурт ашкуӆа няврэмат куртэӆан уӆты хуӆ веӆпасӆаты ёх пиӆан уйтантыӆат. Щи уйтантопсайӆаӆ район па округ Хатӆата постасӆаӆ. Тамащ яӊхапсайӆаӆ онтасан ӆув аршак уятты питсат хуӆ веӆпасӆаты мохиӆув рупата эӆты.
Мет оӆаӊ яӊхапсаеӆан ӆув Павел Григорьевич па Любовь Борисовна Русмиленко пиӆан уйтантысат. Щита ӆув каврам хошъйиӊкан па хуӆан ӆапатсайт. Ямас хошмаӆтысат па хуӆ веӆпасӆаты вер эӆты потар хуӆатсат.
Павел Григорьевич Ӆоркурт рыбоучасткан АО «Горковский рыбозавод» хоща няӆъяӊкем таӆ рупитаӆ. Няврэмата умащ ус ӆувеӆ хуӆантты. Щи тумпийн ӆув мойӊа ёхтам няврэмата аляс, муй хорпи пормасатан хуӆ таӆан па ӆуӊан веӆпасӆаӆа. Потартас, муй верты мосаӆ аршак хуӆ мощатты ураӊан.
Няврэмат уйтты питсат, муй хорпи ӆаварт рупата. Таӆан ищки па вот кутан хуӆ мощатӆа, ӆуӊан па — нипирув, пеӆӊа, вот, хомп кутан. Туп там рупата шеӊк мосты вер. Аратаӆ мир хоща там хоятӆув онтасан хуӆаӊ ӆэвпасат пасанан уӆӆат.
Няврэмата шеӊк умащ ус хуӆантты! Тухаӆ няврэмат ищиты, хоты Павел Григорьевич, хуӆ веӆпасӆаты ӆаӊхаты питсат. Хойтат па нумасӆат, кушкепа матты порайн ноптаӆты пана муй па таӆан пун вантты яӊхты.
Там уйтантопса онтасан кашӊ няврэм уйтты питас воӆаӊ рупата вер эӆты. Ун пумащипа ястасат хотаӊ хоятӊаӆаӆа. Павел Григорьевич па Любовь Борисовна тумтака ат уӆӆаӊан, аршак хуӆ хоӆапӆаӆа ат хойӆ! Сора кеша!
Аллина Тоярова ханшам потар
Авторы
Лух Авт
Темы