обновлено: 11:08, 30 сентября 2026
Лух Авт
Хуӆ веӆпасӆаты пора хасям хатӆат
Ешауӆ ӆуӊ веӆпасӆаты пора си етшаӆ, хасям хатӆат хасьсат. Хуӆ веӆпасӆаты хоятат ӆуӊ сыс мет апраӊа рупитсат, хошам хатӆат па хуӆ манты пуляӊ хуӆӆаӆ масат.
Ӆуӊ порайн Горковской рыбозаводан няӆъяӊ пеӆа ӆапат хуӆ веӆпасӆаты тахайн рыбакат рупитсат. Си тумпийн ӆув сирэӆан хуӆ мосятты хоятат ӆуӊан па вуйӆысайт. Там таӆан план хуват йи сёрс тонна хуӆ маты мосаӆ. Сит эӆты 847 тонна питы хуӆ.
Ин суса йис. Ар пелак ёх планӆаӆ соханты ванамасат. Хасям сютсяты хатӆатан Ӆорвош рыбоучастка ӆуӊтасты хуӆ мосятты хоятат хося Унтсыӆкурта па Ай Сухаӊ Аса тутӆысайм. Ар пелак ёх хоӆ мосты арат хуӆ масат. Хойтат план тэкапты унты хуӆӆаӆ ант тарамӆайт, кашӊ хатӆ хуӆ мосятты яӊхӆат. Сус порайн ӆув ноптаӆман, сойпиман, вар омасман па петель понман уӆӆат.
«Ӆорвош рыбоучасткан штат хуват хольмаӊ пеӆа хут хоят рупитаӆ. Нийӆ хоят ӆуӊ сыс хуӆ мийӆысат. Хуӆ веӆпасӆаты хоятата таӆ сыс квота хуват 519 тонна 810 кила хуӆ мосятты мосаӆ. Там хатӆа 187 тонна 738 кила нови па питы хуӆ мийман уӆ. Таӆ етшаты унты хоӆна сот моӆтас тонна хуӆ веӆпасӆаты хасяс.
Ар пелак хоятӆув планэӆ хоӆ тэкаптасэӆ. Таӆ сыс йи хоята хуӆамхосьяӊ тонна веӆпасӆаты мосаӆ. Тыӆась сыс — 1 300 кила. Кат план хуват хуӆ маты хоятат па уӆӆат. Рупитты хоятӆама пумасипа ясаӊ ястаӆам. Тумтак ёш, тумтак кур!», — Ӆорвош рыбоучасток куся ху Андрей Кондыгин ясаӊ верас.
Альбина Тырлина ханшам потар
