Лух Авт
Хуӆ веӆты ёх пиӆан уйтантыӆат
Ай кер тыӆащан Ямал губернатор Дмитрий Артюхов аратаӆ мира ясаӊ китмаӆан кущаята хуӆ веӆпасӆаты ёх пиӆан уйтантыты партас. Профильной департаментата мосаӆ яха пиӆтащты па ноптаӆты панат хуват яӊхты. Артаӆаты, муй хорпи нётопсайт ӆувиӆаӆа мосӆат.
Щи верты вер иса яха акатты па туӊа-щира номас понман мосты нэпека ӆэщатты мосаӆ. Там мохиӆув атаӊ-хатаӆ потам йиӊкан полщемиӆат, хуӆ веӆпасӆаӆат. Куш вот, ищки, ерт — щиты щи рупитӆат, моӆты ох шук шитты ураӊан. Маты хуӆэӆ сахат вуты тынэӆ па, щеп ӆыпийн ант щулятыйӆ. Щи веран хуӆ маты тын яӆпа вантты мосаӆ.
Там яӊхапсая агропромышленной комплекс хоща рупитты кущайт, Овс мув шимӆаӊ мир хоятат верат туӊматты па сайӆаты департамент, ямальской парламентан рупитты депутат ӆоӊксат. Ӆувиӆаӆа мосаӆ округ ӆоватан уӆты хуӆ веӆпасӆаты ёх рупата харат вантты, щита уӆты куртаӊ кущайт пиӆан уйтантыты, хуӆ веӆпасӆаты мохет па ӆув хоттэӆӆаӆ пиӆан потрэматы.
Хащам ӆапатан Находка па 3-4 Пески хоща яӊхсат, щитат Тазовской районан уӆӆат. Сот хоят кутан потар манас, хой предприятияйн рупитаӆ па община щиран уӆ. Ӆэрапсэӆ, муй арат соӆкувайн там хатӆатан хуӆ вуйӆыӆа, шитты охеӆ камн соӆкувая хойӆ, камн таӆ хопӆаӆан ноптаӆӆат, квотайт хоты сахат ортыӆыӆайт, муй мосаӆ нови хуӆ аршака йиты ураӊан.
«Тамиты хуӆ веӆпасӆаты мохет хоща яӊхман ныӆа, хоты ӆув уӆӆат, оша понты, муй хорпи нётопса мосаӆ община хоятата па муй хорпи предприятияята. Тамащ уйтантопсайт юпийн, ныты питӆа, муй рупата муӊева таӆаӊ тэӆан верты мосаӆ хуӆ веӆпасӆаты ёх хоттэӆат ураӊан», Овс мув шимӆаӊ мир хоятат департамент куща нэ Ульяна Каленюк ястас.
Унт ӆор тыӆащ соханты унты кашӊ ноптаӆты пана кущайт яӊхӆат. Щишан, нын иса потартаты, аӆ еӆамӆыяты. Хоӆпат, хопат, мотурат, ӆуматты сохат, сопекат, посат, ноптаӆты панат сыстаптаты вер эӆты — иса потартаты, машьяйн аӆ уӆаты. Нын уӆапсайн туп нын эӆтайн ӆойӆ.
Аллина Тоярова ханшам потар
Авторы
Лух Авт
Темы